ភ្នំពេញ៖ ឯកឧត្តមបណ្ឌិត ថោង ខុន ទេសរដមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានអញ្ជើញដល់មាតុប្រទេសវិញ បន្ទាប់ពីបានបញ្ចប់បេសកកម្ម នៅក្នុង ជំនួបពិភាក្សាការងារ និងចុះហត្ថលេខាលើផែនការសកម្មភាពរវាងគណៈប្រតិភូកម្ពុជា និងភាគីចិន ដើម្បីអនុវត្តគម្រោងកិច្ចសហប្រតិបត្តិការស្តីពីការត់ប្រណាំងទីក្រុងភ្លោះ រវាង ចក្រភពអង្គរម៉ារ៉ាតុង និង កិច្ចសហប្រតិបត្តិការមេគង្គឡានឆាង តាលីម៉ារ៉ាតុង ដែលកន្លងមកបានចុះហត្ថលេខារវាងគណៈកម្មាធិការជាតិអូឡាំពិកកម្ពុជា និងរដ្ឋបាលកីឡាខេត្តយូណាន កាលពីថ្ងៃទី ០៧ ខែឧសភា ឆ្នាំ២០២៣ នៅរាជធានីភ្នំពេញ។
ថ្លែងនៅអាកាសយានដ្ឋានអន្តរជាតិភ្នំពេញ កាលពីល្ងាចថ្ងៃទី២០ ខែឧសភា ឆ្នាំ២០២៤ ឯកឧត្តមបណ្ឌិត ថោង ខុន មានប្រសាសន៍ថា ៖«យើងទៅលើកនេះទទួលបានលទ្ធផលល្អ ដែលធ្វើឡើងក្នុងក្របខណ្ឌកិច្ចសហប្រតិបត្តិការឡានឆាងមេគង្គ ដែលមាន៦ប្រទេស ហើយតំបន់តាលីនេះ ជាតំបន់ទេសចរណ៍ដ៏ល្អសម្រាប់ខេត្តយូណាន ដោយមានអាកាសធាតុមិនលើសពី២៦អង្សាសេទេ។ ដូច្នេះហើយខេត្តយូណានបានយកតំបន់នេះជាកន្លែងរៀបចំទិវារត់ប្រណាំងអន្តរជាតិ ហើយខេត្តនេះមានគម្រោងពង្រីកទិវារត់ប្រណាំងម៉ារ៉ាតុងនេះឱ្យបានច្រើនលើក ក្នុង១ឆ្នាំៗ ដោយព្រឹត្តិការណ៍នេះទាក់ទាញបានអ្នករត់ ១៦០០០នាក់»។
ជាមួយគ្នានេះ ឯកឧត្តមបណ្ឌិតទេសរដ្ឋមន្ត្រីក៏បានបន្តពិភាក្សាការងារ ដោយបានចុះហត្ថលេខាជាមួយគ្នារួចហើយ ដោយព្រឹត្តិការណ៍ម៉ារ៉ាតុងនៃប្រទេសទាំងពីរ កម្ពុជា-ចិន នឹងត្រូវបញ្ជូនអត្តពលិកអាជីពរបស់ខ្លួនចូលរួមរត់ប្រណាំងទៅវិញទៅមក។ ខេត្តយូណានគ្រោងនឹងបញ្ជូនអត្តពលិករត់អាជីព១០០នាក់ និងអ្នករត់ស្ម័គ្រចិត្ត ៥០០នាក់ មកចូលរួមរត់ប្រណាំង នៅចក្រភពអង្គរម៉ារ៉ាតុង (Full Marathon) នាខែសីហា ឆ្នាំ២០២៤នេះ។ ការរៀបចំទិវាចក្រភពអង្គរម៉ារ៉ាតុង ឆ្នាំ២០២៤នេះនឹងទទួលបានជោគជ័យ ដោយមានអត្តពលិកជាតិ និងអន្តរជាតិចូលរួមកាន់តែច្រើន ដោយសារយើងមានដៃគូ។ គោលបំណងនៃដៃគូក្នុងាការរៀបចំព្រឹត្តិការណ៍កីឡារត់ប្រណាំងម៉ារ៉ាតុងនេះ ភាគីចិនក៏ចង់ផ្សាភ្ជាប់ទាំងលើវិស័យពាណិជ្ជកម្ម វប្បធម៌ និងទេសចរណ៍ តាមរយៈការរៀបចំការតាំងពិព័រណ៍ពាណិជ្ជកម្ម វប្បធម៌ និងទេសចរណ៍។ នៅពេលដែលភាគីចិនរៀបចំព្រឹត្តិការណ៍កីឡា ក៏កម្ពុជានឹងត្រូវទៅតាំងពិព័រណ៍ដែរ។
«ពួកគាត់ចង់យកព្រឹត្តិការណ៍កីឡានេះ ដើម្បីនាំមុខ ក្នុងកិច្ចសហការតំបន់ឡានឆាង-មេគង្គ ពីព្រោះខេត្តយូណាន និងខេត្តសៀមរាប គឺជាទីក្រុងសម្ព័ន្ធមេត្រីជាមួយគ្នា។ ដូច្នេះពួកគាត់ចង់យកកីឡានេះ ដើម្បីរុញកិច្ចសហប្រតិបត្តិការផ្សេងៗទៀត ក្នុងក្របខណ្ឌសម្ព័ន្ធមេត្រីហ្នឹង»។ ឯកឧត្តមបណ្ឌិត ថោង ខុន បានសង្កត់ធ្ងន់បន្ថែម។
គួរបញ្ជាក់ថា ក្រោយពីបានចូលរួមព្រឹត្តិការណ៍តាលីម៉ារ៉ាតុងរួចមក កាលពីថ្ងៃទី១៩ ខែឧសភា ឆ្នាំ២០២៤ គណៈប្រតិភូកម្ពុជា និងភាគីចិនបានជួបពិភាក្សាការងារ និងចុះហត្ថលេខាលើផែនការសកម្មភាពដើម្បីអនុវត្តគម្រោងកិច្ចសហប្រតិបត្តិការស្តីពី “ការត់ប្រណាំងទីក្រុងភ្លោះ” រវាង “ចក្រភពអង្គរម៉ារ៉ាតុង” និង “កិច្ចសហប្រតិបត្តិការមេគង្គឡានឆាង តាលីម៉ារ៉ាតុត។ កិច្ចព្រមព្រៀង និងផែនការសកម្មភាពនេះ គឺពិតជាសក្តិសមណាស់ក្នុងការតភ្ជាប់រវាងទីក្រុងតាលីរបស់ចិន ជាមួយទីក្រុងសៀមរាបអង្គររបស់កម្ពុជា ហើយដែលបច្ចុប្បន្ននេះក៏មានជើងហោះហើរត្រង់ពីទីក្រុងគុនមីង មកភ្នំពេញ និងមកសៀមរាបអង្គរដែរ៕
ប្រភព៖ AKP
