ភ្នំពេញ៖ ការប្រកួតបាល់ទាត់ពានរង្វាន់ជម្រើសជើងឯកខេមបូឌានលីគយុវជនអាយុក្រោម១៦ឆ្នាំ (U16) និងយុវជនក្រោម១៩ឆ្នាំ (U19) រដូវកាល ២០២៤ បានបញ្ចប់សប្តាហ៍ទី២ដូចៗគ្នា កាលពីចុងសប្តាហ៍កន្លងទៅនេះ។
សម្រាប់ឈុត U16 ដែលមាន៥ប្រកួតរួមមាន៖ ក្រុមសៀមរាបយូណាយធីត ចាញ់ វិសាខា ១-២, អាយអេសអាយដង្កោសែនជ័យ ឈ្នះ អង្គរថាយហ្គឺរ ៩-០, ព្រះខ័នរាជស្វាយរៀង ឈ្នះ ណាហ្គាវើល ៤-២, ក្រុមកងយោធពលខេមរភូមិន្ទ (ឬក្រុមទ័ព) ស្មើជាមួយសាលាតម្រង់ទិសរាជធានីភ្នំពេញ ២-២ ខណៈ ភ្នំពេញក្រោន បានចាញ់ក្រុមបឹងកេត ដោយលទ្ធផល ០ទល់២។ ចំពោះតារាងចំណាត់ថ្នាក់បណ្តោះអាសន្នឈុតលីគយុវជន U16 ដោយក្នុងចំណោម១០ក្រុម គឺអាយអេសអាយដង្កោសែនជ័យ, វិសាខា និងព្រះខ័នរាជស្វាយរៀង ឈរលេខរៀងពីលេខ១ដល់លេខ៣ ដោយឆ្លងកាត់២ប្រកួតឈ្នះទាំង២ប្រកួតដូចគ្នា និងមាន៦ពិន្ទុដូៗគ្នា។
ចំពោះលទ្ធផលឈុតយុវជន U19 មាន៥ប្រកួតដែរ រួមមាន៖ អាយអេសអាយដង្កោសែនជ័យ ចាញ់ បឹងកេត ១-២, ណាហ្គាវើលដ៍ យកឈ្នះ សាលាតម្រង់ទិសរាជធានីភ្នំពេញ ៦-០, ក្រុមកងយោធពលខេមរភូមិន្ទ (ឬក្រុមទ័ព) ចាញ់ វិសាខា ០-១, សាលាបាល់ទាត់ជាតិ បានយកឈ្នះ អង្គរថាយហ្គឺរ ៥-១ ខណៈក្រុមភ្នំពេញក្រោន រក្សាបានលទ្ធផលស្មើគ្នាជាមួយ ព្រះខ័នរាជស្វាយរៀង ដោយលទ្ធផលបច្ចេកទេស ៣ទល់៣។ ចំពោះតារាងចំណាត់ថ្នាក់បណ្តោះអាសន្ន ក្នុងចំណោម១០ក្រុមចូលរួមលីគយុវជន U19 នេះ គឺវិសាខាឈរលេខ១ ដោយឈ្នះ២ប្រកួត មាន៦ពិន្ទុ, ណាហ្គាវើលដ៍ ឈ្នះ២ប្រកួត មាន៦ពិន្ទុ ឈរលេខ២ ស្របពេលដែល ក្រុមបឹងកេត ឈរលេខ៣ ឈ្នះ២ប្រកួតដែរ មាន៦ពិន្ទុដូចគ្នា។
គួរបញ្ជាក់ថា ឈុតលីគយុវជន U16 ប្រើប្រាស់ការប្រកួតចំនួន១៨សប្តាហ៍ សម្រាប់ការប្រកួតសន្សំពិន្ទុវិលជុំចំនួន២ជើង លក្ខណៈក្នុងដី និងក្រៅដីពីថ្ងៃទី១៩ ខែឧសភា ដល់ថ្ងៃទី១៣ ខែតុលា ឆ្នាំ២០២៤។ បន្ទាប់ពីបញ្ចប់ការប្រកួត២ជុំ នឹងត្រូវបន្តស្វែងរកជើងឯក ដោយត្រូវប្រកួតវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រ ពីថ្ងៃទី២០ ខែតុលា ដល់ថ្ងៃទី០៣ ខែវិច្ឆិកា ឆ្នាំ២០២៤។ សម្រាប់វគ្គពាក់កណ្តាលផ្តាច់ព្រ័ត្រ គឺក្រុមលើកំពូលតារាងចំនួន៣ក្រុម ពីលេខ២ ដល់លេខ៤នឹងត្រូវប្រកួតប្រជែងនៅវគ្គពាក់កណ្តាលផ្តាច់ព្រ័ត្រ ដោយក្រុម Top 3 ប៉ះ Top 4 ដើម្បីស្វែងរកក្រុមឈ្នះ១ក្រុមឡើងទៅប៉ះក្រុម Top 2 (ឈររង់ចាំ) ហើយក្រុមឈ្នះ១ក្រុមវគ្គពាក់កណ្តាលផ្តាច់ព្រ័ត្រនេះ (ប្រកួតទី២) នឹងត្រូវឡើងប្រជែងម្ចាស់ដំណែងជើងឯកជាមួយក្រុមកំពូលតារាង Top 1 ដែលឈររង់ចាំនៅវគ្គផ្តាច់ព្រ័ត្រ។
ចំពោះឈុត U19 ដែលមាន១០ក្រុមចូលរួមដូចគ្នានឹងឈុត U16នេះដែរ នឹងត្រូវប្រើប្រាស់ចំនួន១៨សប្តាហ៍ ចំនួន២ជុំដូចគ្នា ហើយប្រើប្រាស់រូបមន្តស្វែងរកជើងឯក និងកាលបរិច្ឆេត ដូចឈុត U16 ផងដែរ។ ការប្រកួតបាល់ទាត់ពានរង្វាន់ជម្រើសជើងឯកខេមបូឌានលីគយុវជនអាយុក្រោម១៦ឆ្នាំ (U16) និងយុវជនក្រោម១៩ឆ្នាំ (U19)នេះត្រូវបានរៀបចំឡើងដោយសហព័ន្ធកីឡាបាល់ទាត់កម្ពុជា (FFC)៕
ប្រភព៖ AKP
