ភ្នំពេញ៖ ការប្រកួតកីឡាវាយកូនបាល់ពិភពលោក ក្រុមទី៤ (Davis Cup Asia/Oceania Group 4) ដែលព្រះរាជាណាចក្រកម្ពុជាទទួលរៀបចំធ្វើម្ចាស់ផ្ទះជាប្រវត្តិសាស្ត្រដំបូងបានបញ្ចប់ដោយជោគជ័យយ៉ាងត្រចេះត្រចង់ នៅល្ងាចថ្ងៃទី១៣ ខែកក្កដា ឆ្នាំ២០២៤ នៅពហុកីឡដ្ឋានជាតិមរតកតេជោ ដោយក្រុមកម្ពុជា និងក្រុមស្រីលង្កា បានឡើងទៅប្រកួតកម្រិត៣ (Group 3) នាឆ្នាំ២០២៥ ក្រោយកម្ពុជាឈ្នះក្រុមប្រទេសកាតា ២-០ និងស្រីលង្កា ឈ្នះ គុយវ៉ែត ២-០ នៅវគ្គខ្វែងពូល។
នៅក្នុងការប្រកួតចុងក្រោយ នៃវគ្គខ្វែងពូល លើវិញ្ញាសាឯកត្តជន គឺកីឡាករកម្ពុជា ប៊ុន កេន្នី បានយកឈ្នះកីឡាករកាតាឈ្នះកីឡាករកាតា NAWAF Rashed ៦-៣ និង៦-៤ (គូទី១) ហើយនៅវិញ្ញាសាឯកត្តជនគូទី២ កីឡាករកម្ពុជា ឡេង សារិនរាជ វាយបកយកឈ្នះកីឡាករកាតា Zayid, Mubarak Shannan ដោយលទ្ធផល ១-៦ ៦-៣ និង៦-៣។ ដូច្នេះ ក្រុមម្ចាស់ផ្ទះកម្ពុជា ដែលឈរនៅចំណាត់ថ្នាក់លេខ២ ប្រចាំពូល B បានប្រកួតឈ្នះក្រុមប្រទេសកាតា ដែលឈរនៅចំណាត់ថ្នាក់លេខ១ ប្រចាំពូល A ដោយកម្ពុជាបានឡើងទៅលេងកម្រិត៣ នាឆ្នាំ២០២៥ខាងមុខ។ ចំពោះក្រុមស្រីលង្កា ដែលឈរលេខ២ ប្រចាំពូល A បានយកឈ្នះក្រុមលេខ១ ប្រចាំពូល A ប្រទេសគុយវ៉ែត នៅវគ្គខ្វែងពូល នាល្ងាចថ្ងៃទី១៣កក្កដានេះដែរ ដោយក្រុមស្រីលង្កា បានឡើងទៅលេងកម្រិត៣ដែរ។
ចំពោះប្រតិភូកីឡាវាយកូនបាល់កម្ពុជា រួមមានប្រធានដឹកនាំក្រុម លោក ទេព រិទ្ធិវិទ្ធ និងគ្រូបង្វឹកជម្រើសជាតិកម្ពុជា លោក Braen Aneiros និងកីឡាករជម្រើសជាតិ៥នាក់ គឺកីឡាករ ប៊ុន កេន្នី, ទេព ទីម៉ូធី, ឡេង សារិនរាជ, ឃ្លាំង ពន្លក កីឡាករ Mathew Crusling។
គួររម្លឹកថា ក្រុមវាយកូនបាល់កម្ពុជា ដែលប៉ះ៣ក្រុមក្នុងពូល B គឺបានយកឈ្នះក្រុមអ៊ីរ៉ាក់ បន្តយកឈ្នះក្រុមមីយ៉ាន់ម៉ា និងចាញ់ក្រុមគុយវ៉ែត។ ក្រុមកម្ពុជា ក្នុងឋានៈជាក្រុមលេខ២ ក្នុងពូល B បានយកឈ្នះក្រុមកាតា ដែលឈរនៅលេខ១ ពូល A ទាំងពីរប្រកួត នៅវគ្គខ្វែងពូល។ នេះជាជោគជ័យថ្មីមួយទៀតរបស់ក្រុមវាយកូនបាល់កម្ពុជា បានឡើងទៅលេងក្រុមទី៣ ជាលើកទី២ ក្នុងប្រវត្តិសាស្ត្រ បន្ទាប់ពីចូលរួមប្រទេសកម្ពុជាបានបង្ហាញខ្លួនជាលើកដំបូងក្នុងការប្រកួត Davis Cup Asia/Oceania Group IV កាលពីឆ្នាំ២០១២ នៅប្រទេសកាតា។
ការបង្ហាញខ្លួនលើកដំបូងរបស់កម្ពុជា ក្រុមនេះបានបង្កើតប្រវត្តិសាស្ត្រ ខណៈដែលកម្ពុជាបានយកឈ្នះលើការប្រកួតទាំងមូល ដោយទទួលបានចំណាត់ថ្នាក់លេខ១ ក្នុងការប្រកួត ដែលបានឡើងទៅប្រកួតក្នុងក្រុម៣ Asia/Oceania Group III កាលពីឆ្នាំ២០១៣។ ក្រោយមក កម្ពុជាបានធ្លាក់មកលេងនៅកម្រិត៤វិញ ហើយទើបតែឆ្នាំ២០២៤នេះ ក្រុមកម្ពុជាបានឡើងទៅកម្រិត៣ម្តងទៀត ក្រោយជោគជ័យយ៉ាងធំធេង ទាំងការប្រកួត និងការទទួលរៀបចំ ដោយទទួលបានការកោតសរសើរពីបណ្តាប្រទេសចូលរួមចំនួន៧ប្រទេសផ្សេងទៀត ដូចជាគុយវ៉ែត កៀហ្ស៊ីស៊ីស្ថាន អ៊ីរ៉ាក់ មីយ៉ាន់ម៉ា ស្រីលង្កា កាតា និងអារ៉ាប់រួម។ ម្ចាស់ផ្ទះកម្ពុជាទទួលបានពានរង្វាន់ក្នុងការរៀបចំធ្វើម្ចាស់ផ្ទះបានល្អផងដែរ៕
