អត្តពលិករាំកម្ពុជាឈ្នះមេដាយ១៧គ្រឿង ការប្រកួតអន្តរជាតិនៅវៀតណាម

វៀតណាម៖ កីឡាករ កីឡាការិនី​ជម្រើសជាតិ និង​ថ្នាល​កម្ពុជា​២០​នាក់​បាន​ឈ្នះ​មេដាយ​សរុប ១៧​គ្រឿង ក្នុង​នោះ​មេដាយមាស ៤ ប្រាក់​៦ និង​សំរឹទ្ធ​៧ ពី​ការ​ប្រកួត WDSF World Challenge Cup Rising Star Latin & Standard 2024/WDSF International Open Latin & Standard 2024/KTOC Cup 2024 ដោយ​មាន​២៦​ប្រទេស​ជុំវិញ​ពិភពលោក​ចូលរួម​ប្រកួត ដែល​បាន​ប្រារព្ធ​ឡើង​នៅ​ទីក្រុង​ហូ​ជី​មិ​ញ ប្រទេស​វៀតណាម​ជា​ធ្វើ​ម្ចាស់ផ្ទះ​។

លោកស្រី ហង់ ស៊ី​មន អគ្គលេខាធិការ សហព័ន្ធ​កីឡា​រាំ​កម្ពុជា​គូសបញ្ជាក់​ថា មេដាយ​សរុប​ចំនួន​១៧​គ្រឿង​របស់​កម្ពុជា គឺ​ក្នុង​នោះ​មាន​មេដាយមាស ៤​គ្រឿង មេដាយ​ប្រាក់​៦​គ្រឿង និង​សំរឹទ្ធ ៧​គ្រឿង នៅ​ក្នុង​ការ​ប្រកួត​កីឡា​រាំ WDSF World Challenge Cup, WDSF International Open និង​KTOC Cup 2024 នៅ​ប្រទេស​វៀតណាម​។ មេដាយមាស​ចំនួន​៤​គ្រឿង​របស់​កម្ពុជា​ដណ្តើម​បាន​ដោយ​កីឡាករ​ជម្រើសជាតិ ជុំ លី ហៀ​ង មេដាយមាស​១ គ្រឿង (WDSF World Challenge Cup Raising Star 2024), កីឡាការិនី​ជម្រើសជាតិ សាន រ៉ូ​ហ្សា មេដាយមាស​១​គ្រឿង (WDSF World Challenge Cup Raising Star 2024) និង​កីឡាករ​ថ្នាល ឡុ​ង ចំណូល ឈ្នះ​មេដាយមាស​២​។

លោកស្រី ហង់ ស៊ី​មន បន្ថែម​ថា នេះ​ជា​សមិទ្ធផល​ថ្មី​មួយទៀត​របស់​ប្រភេទ​កីឡា​រាំ​ក​កម្ពុជា ដែល​បាន​កើត​ចេញពី​ការ​ខិតខំ​ប្រឹងប្រែង​ហ្វឹកហាត់​ត្រៀម​បាន​យ៉ា​ល្អ​ស្ទើរ​គ្មាន​ពេល​សម្រាក និង​ការ​ប្រកួត​របស់​កីឡាករ កីឡាការិនី​ជម្រើសជាតិ និង​ថ្នាល​យុវជន​កម្ពុជា​។

គួរ​បញ្ជាក់​ថា ព្រឹត្តិការណ៍​កីឡា​ដ៏​ធំ​ឆ្នាំ​២០២៤ ដែល​ប្រទេស​វៀតណាម​ទទួល​រៀបចំ​ធ្វើ​ម្ចាស់ផ្ទះ​នេះ មាន​២៦​ប្រទេស​ចូលរួម​មក​ពី​ទ្វីបអាស៊ី អឺរ៉ុប អា​មេ​រិ​ក និង​អា​ហ្វ្រិ​ច ដែល​បាន​ប្រព្រឹត្ត​ទៅ​ពី​ថ្ងៃ​ទី​១៣-១៤ ខែកក្កដា ឆ្នាំ​២០២៤៕