ភ្នំពេញ៖ ឯកឧត្តម លន់ សាមឌី ដែលជាប់ឆ្នោតជាប្រធានថ្មី សហព័ន្ធកីឡាបាល់ឱបកម្ពុជាបានបង្ហាញពីការប្តេជ្ញាចិត្តខ្ពស់ ក្នុងការជំរុញការអភិវឌ្ឍវិស័យកីឡាបាល់ឱបកម្ពុជាឱ្យមានដំណើរការល្អទៅមុខ ជាពិសេសរាល់ការសម្រេចចិត្តនានាត្រូវឆ្លងកាត់ការសម្រចចិត្តផ្ទៃក្នុងប្រកបដោយសុខដុមរមនា បន្ទាប់ពីមានបញ្ហាផ្ទៃក្នុងដែលរាំងស្ទះដល់ដំណើរការអភិវឌ្ឍ ក្នុងអាណត្តិ២០២២-២០២៦។
នេះជាការប្តេជ្ញាចិត្តរបស់ឯកឧត្តម នៅក្នុងសន្និបាតវិសាមញ្ញ ដែលបានប្រារព្ធធ្វើឡើងកាលពីថ្ងៃទី២១ ខែកញ្ញា ឆ្នាំ២០២៤ នៅសាលនាយកដ្ឋានកីឡាជំនាញ និងកីឡាមហាជននៃក្រសួងអប់រំ យុវជន និងកីឡា ក្រោមសក្ខីភាពពីលោក ដួង មាសចំរើន អគ្គនាយករង តំណាងឯកឧត្តម ប៉ុន សុខ អគ្គនាយកនៃអគ្គនាយកដ្ឋានកីឡា លោក ប៉ែន វុទ្ធី ប្រធាននាយកដ្ឋានកីឡាជំនាញ និងកីឡាមហាជន លោក ងិន សុខបញ្ញា តំណាងឯកឧត្តម វ៉ាត់ ចំរើន អគ្គលេខាធិការ នៃគណៈកម្មាធិការជាតិ អូឡាំពិកកម្ពុជា និងលោក ទុយ ប៉ុនហឿន អនុប្រធានប្រធាននាយកដ្ឋានកីឡាជំនាញ និងកីឡាមហាជន។
ឯកឧត្តម លន់ សាមឌី បានលើកឡើងថា ក្រោយពីមានបញ្ហាផ្ទៃក្នុង សន្និបាតវិសាមញ្ញត្រូវបានធ្វើឡើង ដើម្បីតម្រង់ទិសដល់ការអភិវឌ្ឍនូវប្រភេទកីឡាអូឡាំពិករបស់កម្ពុជាមួយនេះឱ្យមានដំណើរការល្អប្រសើរឡើងវិញ ជាពិសេសត្រៀមចូលរួមប្រកួតកីឡាថ្នាក់ជាតិ និងអន្តរជាតិ ព្រមទាំងទិសដៅត្រៀមឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី នាឆ្នាំ២០២៩ នៅកម្ពុជាផងដែរ។ ប្រធានថ្មីរូបនេះសង្កត់ធ្ងន់ថា កីឡាបាល់ឱបជាប្រភេទកីឡាជាក្រុម ហើយយើងត្រូវការវិន័យ និងសាមគ្គីភាពជាធ្នុងមួយដ៏រឹងមាំក្នុងក្រុម ទើបធ្វើឱ្យយើងទទួលជោគជ័យរាល់ការប្រកួតនានាទាំងជាតិ និងអន្តរជាតិ។ សព្វថ្ងៃនេះសហព័ន្ធ នឹងត្រៀមខ្លួនចូលរួមព្រឹត្តិការណ៍ការប្រកួតកីឡា SEA GAMES 2025 លើកទី៣៣ នៅប្រទេសថៃ និងការប្រកួតកម្រិតអន្តរជាតិ នានាពេលខាងមុខនេះ។ ឯកឧត្តម លន់ សាមឌី ក៏អះអាងដែរថា ចាប់ពីពេលនេះតទៅ រាល់ការសម្រេចចិត្តនានានៅក្នុងផ្ទៃក្នុងសហព័ន្ធត្រូវបានឆ្លងកាត់ការសម្រេចចិត្តរួមគ្នា ក្នុងស្មារតីរបស់គណៈកម្មាធិការប្រតិបត្តិទាំងអស់ ដែលកើតចេញពីការបោះឆ្នោតត្រឹមត្រូវ និងយុត្តិធម៌ ក្រោមសក្ខភាពរបស់អាជ្ញាធរកីឡា និងគណៈកម្មាធិការជាតិអូឡាំពិកកម្ពុជា។
ជាមួយគ្នានេះ លោក ដួង មាសចំរើន អគ្គនាយករងកីឡាបានលើកឡើងថា កន្លងមក ផ្ទៃក្នុងសហព័ន្ធមានបញ្ហា ហើយតាមរយៈសន្និបាតវិសាមញ្ញនេះ សហព័ន្ធនឹងអាចដើរឆ្ពោះទៅមុខក្នុងកិច្ចកការអភិវឌ្ឍរបស់ខ្លួនប្រកបដោយភាពកក់ក្តៅ។ តំណាងអគ្គនាយកដ្ឋានកីឡារូបនេះបានកោតសរសើរ និងវាយតម្លៃខ្ពស់ចំពោះសហព័ន្ធកីឡាបាល់ឱបកម្ពុជា ក្នុងការអភិឌ្ឍកីឡាប្រភេទនេះ ជាពិសេសប្រធានថ្មី ត្រូវជំរុញឱ្យបានខ្លាំងក្លាជាង នេះទៅទៀត ដើម្បីត្រៀមខ្លួនចូលរួមព្រឹត្តិការណ៍ការប្រកួតកីឡាបាល់ឱបកម្រិតអន្តរជាតិ។ ចំពោះសហព័ន្ធកីឡាបាល់ឱបកម្ពុជា ខិតខំប្រឹងប្រែង ដើម្បីលើកកម្ពស់ឱ្យវិស័យបាល់ឱបកម្ពុជាមានការរីកចម្រើនទាំងផ្នែកចំណេះដឹង បច្ចេកទេស និងជំនាញ។
គួរបញ្ជាក់ថា សម្រាប់សន្និបាតវិសាមញ្ញនេះ មានសមាជិកប្រតិបត្តិ១១រូប រួមមាន ឯកឧត្តម លន់ សាមឌី ប្រធានថ្មី លោក ម៉ូណាំង ហ្វីលីព អនុប្រធាន លោក ខេង សុភាព លោក ម៉ូណាំង ហ្វីលីព អនុប្រធាន លោក ពេជ្រ រតនា អគ្គលេខាធិការ លោក ផាន សុភា លោក ចន សាមឺឌី លោក អ៊ុក ដារ៉ា អគ្គលេខាធិការរង លោក យ៉ន វ៉ាន់ថា អគ្គហេរញ្ញិក លោក អ៊ុត វុទ្ធី លោក ជ្រូ គឹមសៀង និងលោក យុន សុផា សមាជិក៕
