ភ្នំពេញ៖ លោក KOJI GYOTOKU គ្រូបង្គោលក្រុមជម្រើសកម្ពុជាបានលើកឡើងថា យើងក៏ចង់ឈ្នះដូចអ្នកគាំទ្រដែរដោយសារការចាញ់កន្លងមកធ្វើឱ្យកីឡាករមួយចំនួនរាងបាត់ទំនុកចិត្តបន្តិចក្នុងការលេង។
នេះជាការលើកឡើងរបស់គ្រូបង្គោលកម្ពុជា ក្នុងឱកាសសន្និសីទសារព័ត៌មាន កាលពីល្ងាចថ្ងៃទី១០ ខែតុលា ឆ្នាំ២០២៤ មុនការប្រកួតមិត្តភាពអន្តរជាតិជាមួយក្រុមឆាយនិសតៃប៉ិ នៅទីលានពហុកីឡដ្ឋានជាតិអូឡាំពិក នៅយប់ថ្ងៃទី១១ ខែតុលា ឆ្នាំ២០២៤នេះ។
លោក KOJI GYOTOKU គូសបញ្ជាក់ថា បើទោះបីជាកីឡាករយើតបានទំនុកចិត្តបន្តិច ក្នុងការលេងក្តី ប៉ុន្តែលោកសង្កេតឃើញថា ក្នុងការប្រមូលផ្តុំលើកនេះយើងមានកីឡាករល្អៗច្រើន ហើយពួកគេកាន់តែយល់ចិត្តគ្នាបានល្អជាងមុន ដូច្នេះលោករំពឹងថាពួកគេនឹងធ្វើបានល្អច្រើនជាងលើកមុនក្នុងពេលប្រកួត។ លោក KOJI GYOTOKU បន្ថែមថា ក្រុមនឹងរក្សាការប្រយុទ្ធដដែល ទោះបីលោកមានរយៈពេលខ្លី ដើម្បីរៀបចំក្រុម ក៏ដូចជាការត្រៀមខ្លួនមិនទាន់បានល្អប្រសើរក៏ដោយ។ គោលដៅសំខាន់របស់លោក គឺនឹងព្យាយាមស្វែងយល់ពីកីឡាករឱ្យបានច្រើន តាមរយៈការប្រកួតនេះ ដើម្បីពង្រឹងក្រុមឱ្យបានកាន់តែល្អត្រៀមការប្រកួតបន្ដបន្ទាប់ទៀត។
ជាមួយគ្នានេះ លោក Gary John White គ្រូបង្គោលក្រុមឆាយនិស តៃប៉ិ បានលើកឡើងដែរថា អរគុណកម្ពុជា ដែលទទួលក្រុមរបស់លោកបានយ៉ាងល្អ ហើយការប្រកួតនៅយប់ថ្ងៃនេះ ក្រុមលោកនឹងព្យាយាមធ្វើយ៉ាងណាឱ្យល្អ ព្រោះក្រុមទាំងពីរសុទ្ធតែមានកម្រិតប្រហាក់ប្រហែលគ្នា។ គ្រូបង្វឹកសញ្ជាតិអង់គ្លេសដដែលរូបនេះបានសង្គត់ធ្ងន់បន្ថែមថា ការប្រកួតនេះជាការប្រកួតមិត្តភាព ដូច្នេះលោករំពឹងបានផ្ដល់ឱកាសដល់កីឡាករក្មេងៗដែលទើបតែត្រូវបានកោះហៅ ដើម្បីកសាងក្រុមមួយជាមួយនឹងប្រព័ន្ធថ្មី។
គួររម្លឹកថា ប្រវត្តិធ្លាប់ជួបគ្នា ៣លើករបស់ក្រុមកម្ពុជា និងក្រុមឆាយនិស តៃប៉ិ គឺកាលពីថ្ងៃទី០៨ ខែតុលា ២០១៤ ឆាយនីសតៃប៉ិ ចាញ់ក្រុម កម្ពុជា ០-២ ក្នុងជំនួបមិត្តភាពអន្តរជាតិ, ថ្ងៃទី០២ ខែមិថុនា ឆ្នាំ២០១៦ ឆាយនិស តៃប៉ិ ស្មើជាមួយក្រុមកម្ពុជា ២-២ ក្នុងវគ្គជម្រុះ AFC Asian Cup និងថ្ងៃទី០៧ ខែមិថុនា ឆ្នាំ២០១៦ កម្ពុជា បានយកឈ្នះឆាយនីសតៃប៉ិ ២-០ ក្នុងវគ្គជម្រុះ AFC Asian Cup។ ក្រោយចប់ការប្រកួតមិត្តភាពអន្តរជាតិទល់នឹងឆាយនីសតៃប៉ិ នៅថ្ងៃទី១៥ ខែតុលា ឆ្នាំ២០២៤ គឺក្រុមជម្រើសជាតិកម្ពុជានឹងត្រូវជួបហុងកុង នៅកីឡដ្ឋាន Hong Kong Stadium ក្នុងជំនួបមិត្តភាពអន្តរជាតិដែរ។
សូមបញ្ជាក់ថា តាមរយៈការប្រកួតមិត្តភាពកម្តៅសាច់ដុំអន្តរជាតិ២ប្រកួតនេះ គឺក្រុមកម្ពុជានឹងត្រូវប្រកួតពានរង្វាន់អាស៊ាន (2024 ASEAN Championship ឬ AFF Mitsubishi Electric Cup) ដែលគ្រោងនឹងចាប់ផ្តើម ថ្ងៃទី៨ ខែធ្នូ ឆ្នាំ២០២៤ ដល់ថ្ងៃទី៥ ខែមករា ឆ្នាំ២០២៥) ដោយកម្ពុជាស្ថិតនៅពូល A ជាមួយថៃ, ម៉ាឡេស៊ី, សិង្ហបុរី និង ប្រ៊ុយណេ ឬទីម័រខាងកើត ដែលត្រូវប្រកួតជម្រុះបឋមជាមួយគ្នា ២ជើង ដែលជើងទី១ ទីម័រខាងកើតបានយកឈ្នះប្រ៊ុយណេ ១-០ កាលពីថ្ងៃទី០៨ ខែតុលា ឆ្នាំ២០២៤ ហើយនៅថ្ងៃទី១៥ខែតុលាខាងមុខ ក្រុមទាំងពីរនឹងត្រូវជួបគ្នាម្តងទៀត ដើម្បីកាត់សេចក្តីរកក្រុមឈ្នះ១ក្រុមឡើងមកបង្គ្រប់ក្នុងពូល A៕
