ភ្នំពេញ៖ ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរគូសបញ្ជាក់ថា ការប្រកួតកីឡាបាល់ទាត់មិត្តភាពសប្បុរសធម៌ ក្រោមមូលបទ «យើងរួមគ្នាលើកស្ទួយ ជួយគុនខ្មែរ»ទទួលបានការឧបត្ថម្ភលើកទឹកចិត្តដ៏ខ្ពស់ខ្ពស់ពីសម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ចំនួន ១០០លានរៀល និងអ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយកក្រុមហ៊ុន ខ្មែរប៊ែរើរីជីសបានឧបត្ថម្ភថវិកាចំនួន២០០លានរៀល សរុបថវិកាទទួលបានជាបឋម គឺចំនួន ៣០០លានរៀល។
នេះបើតាមការបញ្ជាក់របស់ឯកឧត្តម ខូវ ឆាយ នៅក្នុងសន្និសីទសារព័ត៌មាន កាលពីល្ងាចថ្ងៃទី២២ ខែតុលា ឆ្នាំ២០២៤ នៅសាលកីឡាសម្តេចពិជ័យសេនា ទៀ បាញ់ នៃមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) រាជធានីភ្នំពេញ។
ឯកឧត្តម ខូវ ឆាយ គូសបញ្ជាក់ថា ការប្រកួតបាល់ទាត់មិត្តភាពសប្បុរសធម៌ ក្រោមមូលបទ «យើងរួមគ្នា លើកស្ទួយ ជួយគុនខ្មែរ» មាន២ប្រកួត នៅស្តាតចាស់ ចាប់ពីម៉ោង៣រសៀលតទៅ នាថ្ងៃទី២៩ ខែតុលា ឆ្នាំ២០២៤ ដោយការប្រកួតគូទី១ ក្រុមបាល់ទាត់តារាកម្ពុជា (B) ប្រកួតជាមួយក្រុមអ្នកអត្ថាធិប្បាយប្រដាល់គុនខ្មែរ និងការប្រកួតគូទី២ ជាការជួបគ្នារវាង ក្រុមបាល់ទាត់តារាកម្ពុជា (A) ជាមួយ ក្រុមកីឡាករប្រដាល់គុនខ្មែរ។ គោលបំណងចម្បងនៃព្រឹត្តិការណ៍បាល់ទាត់សប្បុរសធម៌នេះ គឺដើម្បីកៀរគរមូលនិធិពីបណ្តាសប្បុរសជន និងប្រជាពលរដ្ឋខ្មែរទាំងក្នុង និងក្រៅប្រទេស ដែលមានបំណងចង់ចូលរួមឧបត្ថម្ភគាំទ្រ អាចបរិច្ចាគថវិកាតាមលទ្ធភាព ទោះតិចក្តី ច្រើនក្តី ដើម្បីយកទៅជួយដល់ក្លឹបកីឡាប្រដាល់គុនខ្មែរនានា ដែលកំពុងជួបការខ្វះខាត។
ប្រធានសហព័ន្ធប្រដាល់គុនខ្មែររូបនេះសង្កត់ធ្ងន់ថា បន្ទាប់ពីលោកបានចុះទស្សនកិច្ចសិក្សាស្វែងយល់តាមបណ្តាខេត្តនានាកន្លងទៅនេះ ឯកឧត្តមបានឃើញផ្ទាល់ភ្នែកនូវការខ្វះខាត និងការលំបាករបស់ក្លឹបជាច្រើនដូចជាទីកន្លែងហ្វឹកហាត់ សម្ភារ និងថវិកាជាដើម ប៉ុន្តែពួកគាត់មានតែកម្លាំងកាយចិត្តតស៊ូហ្វឹកហាត់ទាំងលំបាកវេទនា។ អាស្រ័យឃើញការខ្វះខាត និងទុក្ខលំបាករបស់គ្រូបង្វឹក កីឡាករ កីឡាការិនីដែលតស៊ូក្នុងប្រដាល់គុនខ្មែរទាំងនោះហើយទើបបានឯកឧត្តមរកវិធីសាស្ត្រ ដែលអាចជួយសម្រាលទុក្ខលំបាករបស់ពួកគាត់បានខ្លះ ក្នុងន័យជួយលើកទឹកចិត្ត និងអភិវឌ្ឍវិស័យប្រដាល់គុនខ្មែរ ដែលជាប្រភេទកីឡាអត្តសញ្ញាណជាតិខ្មែរ។
ឯកឧត្តម ខូវ ឆាយ បានលើកឡើងទៀតថា ដោយសារតែចក្ខុវិស័យបែបនេះហើយ ទើបសហព័ន្ធកីឡាប្រដាល់គុនខ្មែរបានសហការជាមួយក្រុមបាល់ទាត់តារាកម្ពុជា និងក្រុមអ្នកអត្ថាធិប្បាយកីឡាប្រដាល់គុនខ្មែរដើម្បីរៀបចំឲ្យមានព្រឹត្តិការណ៍ប្រកួតបាល់ទាត់មិត្តភាពសប្បុរសធម៌នេះឡើង។ អ្វីដែលកាន់តែពិសេស និងមហាកិត្តិយស គឺទទួលបានការគាំទ្រយ៉ាងពេញទំហឹងពីសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត។
ជាមួយគ្នានេះ លោក ឈិន ឈឿន គ្រូបង្វឹកក្រុមបាល់ទាត់តារាកម្ពុជា និងតារាចម្រៀង ខេម ប្រធានក្រុមបាល់ទាត់តារាកម្ពុជាក៏បានបង្ហាញក្តីរីករាយជាខ្លាំង ដែលបានសហការរៀបចំការប្រកួតបាល់ទាត់សប្បុរសធម៌ដ៏មានអត្ថន័យនេះឡើង និងបានជួយដល់វិស័យកីឡាប្រដាល់គុនខ្មែរ។ លោក ខេម គូសបញ្ជាក់ថា ក្រុមបាល់ទាត់តារាកម្ពុជា និងក្នុងនាមខ្លួនលោកផ្ទាល់ពិតជាមានមហាកិត្តិសវិសេសវិសាលណាស់ដែលចូលរួមកិច្ចសប្បុរសធម៌។ ជាពិសេសការប្រកួតបាល់ទាត់មិត្តភាពសប្បុរសធម៌ដើម្បីជួយគុនខ្មែរទទួលបានការគាំទ្រពីសម្តេចតេជោ និងសម្តេចកិត្តិព្រឹទ្ធបណ្ឌិត ដោយនេះជាកម្លាំងចិត្តដ៏ធំធេងដែលផ្តល់ឱ្យក្រុមបាល់ទាត់តារាកម្ពុជា ក៏ដូចជាអ្នកចូលរួមទាំងអស់មានបន្តធ្វើទៅថ្ងៃក្រោយទៀត៕
