ភ្នំពេញ៖ កីឡាករកាយវប្បកម្មជម្រើសជាតិកម្ពុជា យូ ឃាងហ៊ុយ បានឈ្នះមេដាយសំរឹទ្ធ ១គ្រឿងលើវិញ្ញាសា Men’s Sports Physique over 180cm +4Kg ក្នុងការប្រកួតជើងឯកកីឡាកាយវប្បកម្មពិភពលោក លើកទី១៥ ឆ្នាំ២០២៤ នៅទីក្រុង ADDU សាធារណរដ្ឋម៉ាល់ឌីវ។
នេះបើតាមការបញ្ជាក់របស់លោក តឹក ប៊ុនវី ប្រធានប្រតិភូដឹកនាំ និងជាចៅក្រមកម្ពុជាបានជម្រាបតាមសារអេឡិចត្រូនិកពីសាធារណរដ្ឋម៉ាល់ឌីវ កាលពីថ្ងៃទី១០ ខែវិច្ឆិកា ឆ្នាំ២០២៤មកថា សហព័ន្ធកីឡាកាយវប្បកម្ម និងលំហាត់ប្រាណកម្ពុជាបានបញ្ជូនក្រុមគណៈប្រតិភូ ចៅក្រមអន្តរជាតិ គ្រូបង្វឹក កីឡាករកាយវប្បកម្មចំនួន ៣នាក់ចូលរួមប្រកួតកីឡាកាយវប្បកម្មជើងឯកពិភពលោក ដែលបានប្រព្រឹត្តិទៅពីថ្ងៃទី០៥-១១ ខែវិច្ឆិកា ឆ្នាំ២០២៤ នៅទីក្រុង ADDU សាធារណរដ្ឋម៉ាល់ឌីវ។
លោក តឹក ប៊ុនវី បានឱ្យដឹងថា កីឡាករកាយវប្បកម្មកម្ពុជា យូ ឃាងហ៊ុយឈ្នះមេដាយសំរឹទ្ធ ១គ្រឿងលើវិញ្ញាសា Men’s Sports Physique over 180cm +4Kg នៃការប្រកួតជើងឯកកីឡាកាយវប្បកម្មពិភពលោក ខណៈកីឡាករកាយវប្បកម្មថៃ ទទួលបានមេដាយមាស។
លោកស្រី អេមី សារីរ៉ុម គ្រូបង្វឹក បានប្រាប់តាមសារអេឡិចត្រូនិកមកដែរថា កីឡាករកម្ពុជា ឃូ ឃាងហ៊ុយ ធ្លាប់បទទួលបានមេដាយសំរឹទ្ធ ក្នុងការប្រកួតជើងឯកពិភពលោក នៅប្រទេសកូរ៉េខាងត្បូង កាលពីឆ្នាំ២០២៣ និងម្ចាស់មេដាយមាស ក្នុងការប្រកួតកីឡាកាយវប្បកម្មជើងឯកអាស៊ី លើកទី៥៦ ឆ្នាំ២០២៤ កាលពីថ្ងៃទី០៦-១២ ខែសីហា ឆ្នាំ២០២៤ នៅប្រទេសឥណ្ឌូណេស៊ី។ លោកស្រីបន្តថា ការប្រកួតកីឡាកាយវប្បកម្ម ជើងឯកពិភពលោក លើកទី១៥ ឆ្នាំ២០២៤នេះមានកីឡាករចូលរួមមកពីជាង ៥០ប្រទេស ដែលជាចំនួនច្រើនជាងការប្រកួតជើងឯកពិភពលោក នៅកូរ៉េខាងត្បូង កាលពីឆ្នាំ២០២៣ កន្លងទៅ។ ដូច្នេះកីឡាករកម្ពុជា ឃូ ឃាងហ៊ុយ នៅតែធ្វើបានល្អដណ្តើមមេដាយសំរឹទ្ធ១គ្រឿងជូនប្រទេសជាតិបានដដែល។
សហព័ន្ធបានបញ្ជូនប្រតិភូ ចៅក្រម គ្រូបង្វឹក និងកីឡាករ ៣ នាក់ទៅចូលរួមប្រកួតជ្រើសរើសជើងឯកកីឡាកាយវប្បកម្មពិភពលោក លើកទី១៥ ដែលនឹងប្រព្រឹត្តទៅនៅថ្ងៃទី៥-១១ ខែវិច្ឆិកា ឆ្នាំ២០២៤ នៅទីក្រុង ADDU សាធារណរដ្ឋម៉ាល់ឌីវ រួមមានរូបលោក ប្រធានដឹកនាំ និងជាចៅក្រម លោកស្រី អេមី សារីរ៉ុម គ្រូបង្វឹក និងកីឡាករ យូ ឃាងហ៊ុយ៕
