ភ្នំពេញ៖ ប្រតិភូកីឡាតេក្វាន់ដូ WT ក្រសួងមហាផ្ទៃបានវិលត្រឡប់មកដល់មាតុប្រទេសវិញ កាលពីល្ងាចថ្ងៃទី១០ ខែធ្នូ ឆ្នាំ២០២៤ បន្ទាបពីដណ្តើមបានមេដាយសរុប៧គ្រឿង ពីការប្រកួត ASIAN OPEN POLICE TAEKWONDO CHAMPIONSHIPS 2024 នៅប្រទេសវៀតណាម។
មេដាយសរុប៧គ្រឿងដែលអត្តពលិកតេក្វាន់ដូ WTក្រសួងមហាផ្ទៃដណ្តើមបានពីព្រឹត្តិការណ៍អន្តរជាតិនៅវៀតណាមនេះ មានមេដាយមាស៤ ប្រាក់២ និងសំរឹទ្ធ១គ្រឿង ដោយការប្រកួតបានដំណើរចាប់ពីថ្ងៃទី៤ដល់ថ្ងៃទី៩ ខែ ធ្នូ ឆ្នាំ២០២៤ នៅខេត្ត Quang Ninh ប្រទេសវៀតណាម។ លោកវរសេនីត្រី ឆូយ ពុទ្ធា ប្រតិភូដឹកនាំ បានគូបញ្ជាក់នៅអាកាសយានដ្ឋានអន្តរជាតិភ្នំពេញថា សមិទ្ធផលដែលទទួលបានពីព្រឹត្តិការណ៍នេះមិនមែនជាសមិទ្ធផលថ្មីសម្រាប់អត្តពលតេក្វាន់ដូក្រសួងមហាផ្ទៃឡើយ ពោលគឺការដណ្តើមបានមុនៗគឺចំនួនប្រហាក់ប្រហែលដូចគ្នានេះដែរ។
លោកវរសេនីត្រី ឆូយ ពុទ្ធា ប្រតិភូដឹកនាំបានគូសបញ្ជាក់ថា សម្រាប់ការចូលរួមក្រោយៗទៀតក្នុងព្រឹត្តិការណ៍ប្រកួតអន្តរជាតិដែលថ្នាក់ដឹកបញ្ជូនទៅចូលរួមក្រុមតេក្វាន់ដូWTក្រសួងមហាផ្ទៃប្តេជ្ញាចិត្តនឹងដណ្តើមឱ្យបានលទ្ធផលល្អជាងនេះបន្ថែមទៀត ដើម្បីលើកមុខមាត់អង្គភាពលើឆាកអន្តរជាតិ។ ជាមួយគ្នានេះ ក្នុងនាមតំណាងក្រុមទាំងមូលបានថ្លែងអំណរគុណជូនចំពោះឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម សរ សិទ្ធិ រដ្ឋលេខាធិការក្រសួងមហាផ្ទៃ ព្រមទាំងឯកឧត្តម យិត ភិរៈ ដែលបានយកចិត្តទុកដាក់តាមដានគាំទ្រឧបត្ថម្ភចំពោះសុខទុកអត្តពលិកកីឡាតេក្វាន់ដូក្រសួងមហាផ្ទៃទាំងការហ្វឹកហាត់ និងពេលប្រកួត។
ព្រឹត្តិការណ៍ ASIAN OPEN POLICE TAEKWONDO CHAMPIONSHIPS នៅប្រទេសវៀតណាមនេះ បានដំណើរចាប់ពីថ្ងៃទី៤ដល់ថ្ងៃទី៩ ខែធ្នូ ឆ្នាំ២០២៤ មាន២៩ប្រទេសចូលរួមសរុបមន្ត្រី ប្រតិភូ គ្រូបង្វឹក និងអត្តពលិកជាង ២,៥០០នាក់។ សម្រាប់សមាគមកីឡាតេក្វាន់ដូ WT ក្រសួងមហាផ្ទៃ បានបញ្ជូនប្រតិភូដឹកនាំ គ្រូបង្វឹក គ្រូជំនួយ កីឡាករ កីឡាការិនី សរុបចំនួន១៤រូប ប្រតិភូ គ្រូបង្វឹក គ្រូជំនួយ កីឡាករ និងកីឡាការិនី ជានគរបាលជាតិមានចំនួន១១រូប។
គួរបញ្ជាក់ថា ជាលទ្ធផលអត្តពលិកក្រសួងមាផ្ទៃដណ្តើមបានមេដាយជូនជាតិ ៧គ្រឿង ក្នុងនោះមានមេដាយមាស៤ ប្រាក់២ និងសំរឹទ្ធ១គ្រឿង។ ១.កីឡាការិនី ណាង វណ្ណៈ ឈ្នះមេដាយមាស ១គ្រឿង វិញ្ញាសាមេគុន ឯកត្តជននារី ២.កីឡាករ ផល សុវណ្ណាត់ មេដាយមាស ១គ្រឿង វិញ្ញាសាមេគុន ឯកកត្តជនបុរស ៣.កីឡាករសុវណ្ណាត់ និងកីឡាការិនី ណាង វណ្ណៈ មេដាយមាស ០១គ្រឿង វិញ្ញាសាមេគុនគូ បុរស-នារី ៤.កីឡាករ វ៉ា មិថុនា មេដាយមាស០១គ្រឿង វិញ្ញាសាប្រយុទ្ធ ទម្ងន់ក្រោម ៨០គីឡូក្រាម ៥.កីឡាការិនី ឈឿង អាលីហ្សា មេដាយប្រាក់០១គ្រឿង វិញ្ញាសាប្រយុទ្ធ ទម្ងន់ក្រោម ៥៧គីឡូក្រាម ៦.កីឡាករ វ៉ាន់ រិទ្ធី មេដាយប្រាក់០១គ្រឿង វិញ្ញាសាប្រយុទ្ធ ៧.កីឡាករសំ យូដេត មេដាយសំរឹទ្ធ០១គ្រឿង វិញ្ញាសាប្រយុទ្ធ ទម្ងន់ក្រោម ៥៨គីឡូក្រាម៕
