ភ្នំពេញ៖ ក្រុមព្រះខ័នរាជស្វាយរៀង និងក្រុមវិសាខា បានឡើងទៅកាន់វគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល ២០២៤-២០២៥ បន្ទាប់ពីបានទម្លាក់គូប្រជែងរៀងៗខ្លួន នៅវគ្គ៨ក្រុមចុងក្រោយថ្នាក់ជាតិ ជើងទី២ កាលពីយប់ថ្ងៃទី០២ ខែមេសា ឆ្នាំ២០២៥។
នេះជាបេក្ខភាព២ក្រុមទៀត ដែលបានកក់កៅអីសម្រាប់វគ្គពាក់កណ្តាលផ្តាច់ព្រ័ត្រ ដែលបានរកឃើញ សរុប៣ក្រុម គឺភ្នំពេញក្រោន ដែលបានរកឃើញមុនគេ កន្លងទៅ និងព្រះខ័នរាជស្វាយរៀង ព្រមទាំងក្រុមវិសាខា ខណៈបេក្ខភាព១ក្រុមទៀត រង់ចាំការប្រកួតកាត់សេចក្តីជើងទី២ នៅយប់ថ្ងៃទី០៣ ខែមេសានេះ រវាងក្រុមបឹងកេត និងក្រុមអាយអេសអាយដង្កោសែនជ័យ។
សម្រាប់២ប្រកួត កាលពីយប់ថ្ងៃទី០២ ខែមេសា ឆ្នាំ២០២៥ វគ្គ៨ក្រុមចុងក្រោយថ្នាក់ជាតិ ជើងទី២ គឺព្រះខ័នរាជស្វាយរៀងបន្តយកឈ្នះក្រុមគិរីវង់សុខសែនជ័យ ដោយលទ្ធផលបច្ចេកទេស ៣-២ សរុបលទ្ធផលទាំងពីរជើង ៥-២។ ចំពោះវិសាខា បានយកឈ្នះក្រុមកងយោធពលខេមរភូមិន្ទ (ទ័ព) ក្នុងលទ្ធផល ៤-០ សរុបទាំងពីរជើង ៦-២ (កាលពីជើងទី១ ស្មើគ្នា ២-២)។ សម្រាប់បេក្ខភាព១ក្រុមចុងក្រោយនៃវគ្គពាក់កណ្តាលផ្តាច់ព្រ័ត្រ នឹងត្រូវរង់ចាំការប្រកួតកាត់សេចក្តីនៅជើងទី២ នៅយប់ថ្ងៃទី០៣ ខែមេសានេះ រវាងក្រុមបឹងកេត និងអាយអេសអាយដង្កោសែនជ័យ ដោយកាលពីជើងទី១ បឹងកេត ក្នុងនាមជាក្រុមភ្ញៀវបានយកឈ្នះ អាយអេសអាយដង្កោសែនជ័យ ២-០។
គួរបញ្ជាក់ថា ការប្រកួតវគ្គពាក់កណ្តាលផ្តាច់ព្រ័ត្រ ពានរង្វាន់សម្តេចតេជោ ហ៊ុន សែន ថ្នាក់ជាតិ ២០២៤-២០២៥នេះ គ្រោងនឹងធ្វើឡើងនាថ្ងៃទី២៣ ខែមេសា ឆ្នាំ២០២៥ ទាំង២ប្រកួតសម្រាប់ជើងទី១ ហើយជើងទី២គ្រោងនឹងធ្វើឡើងនាថ្ងៃទី០៧-០៨ ខែឧសភា ឆ្នាំ២០២៥។ ២ក្រុមចាញ់ៗនៅវគ្គពាក់កណ្តាលផ្តាច់ព្រ័ត្រនេះនឹងត្រូវប្រកួតដណ្តើមចំណាត់ថ្នាក់លេខ៣ ខណៈ២ក្រុមឈ្នះៗនឹងត្រូវឡើងទៅប្រជែងម្ចាស់ដំណែងជើងឯក នាថ្ងៃទី២៥ ខែឧសភា ឆ្នាំ២០២៥ ខាងមុខ៕
