ភ្នំពេញ៖ សហព័ន្ធកីឡាបាល់ទាត់កម្ពុជា (FFC) បានចេញបញ្ជីឈ្មោះកីឡាករជម្រើសជាតិកម្ពុជា២៦នាក់ ដើម្បីប្រមូលផ្ដុំហ្វឹកហាត់ត្រៀមការប្រកួតមិត្តភាពអន្ដរជាតិ២ប្រកួតជាមួយក្រុមហុងកុង និងម៉ាកាវ ដើម្បីត្រៀមឆ្ពោះទៅប្រកួតជម្រុះពានរង្វាន់បាល់ទាត់ពិភពលោក (FIFA World Cup 2026)។ លោក Felix Dalmas គ្រូបង្គោលជនជាតិអាហ្សង់ទីននៃក្រុមជម្រើសជាតិកម្ពុជាបានកោះហៅកីឡាករ ២៦នាក់ ក្នុងនោះ មានដូចជាកីឡាករ សៀង ចន្ធា ដែលកំពុងប្រកបអាជីពជាមួយក្លឹប Shahania Sports Club លីគទី២ ប្រទេសកាតា។ កីឡាករ សឿយ វិសាល, គួច ដានី និង ថេឡរ ឌឿង នីកូឡាស មកពីព្រះខ័នរាជស្វាយរៀង។
កីឡាករ វ៉ាន់ តៃឡាម៉ី, ជា វេសលី, ចាន់ វឌ្ឍនាកា, ចន្ថា ចន្ទាកា, ឃាន់ សុប៉ិន និង កាន់ ពិសាល មកពីក្លិបបឹងកេត។ កីឡាករ ឈង់ ប៊ុនណា និង គួច សុកុម្ភៈ មកពីណាហ្គាវើលដ៍។ កីឡាករ អ៊ន ចាន់ប៊ូលីន, លឹម ពិសុទ្ធ, យ៉ើ មូស្លីម, ផាច សុជាវីឡា និង ជួន ចាន់ចាវ មកពីភ្នំពេញក្រោន។ កីឡាករ គីម ចាន់វាសនា និង គង់ លីហ៊ួរ មកពីព្រៃវែងអេហ្វស៊ី ព្រមទាំងកីឡាករ ហ៊ុល គឹមហ៊ុយ, អ៊ិន សូដាវីដ, អ៊ុក សុវណ្ណ, ស៊ិន សុផាណាត់, កែវ សុខសិលា, រ៉ឹង ប៊ុនហៀង និង ស៊ិន កក្កដា មកពីវិសាខា។
ក្រុមជម្រើសជាតិកម្ពុជានឹងបើកការប្រមូលផ្ដុំហ្វឹកហាត់ នៅថ្ងៃទី៣០ ខែសីហា ឆ្នាំ២០២៣នេះ ដើម្បីត្រៀមការប្រកួតមិត្តភាពអន្ដរជាតិទាំង ២ប្រកួត នៅពហុកីឡដ្ឋានជាតិអូឡាំពិក ដោយត្រូវជួបក្រុមហុងកុង នាថ្ងៃទី០៧ ខែកញ្ញា និងជួបក្រុមម៉ាកាវ នាថ្ងៃទី១១ ខែកញ្ញា ឆ្នាំ២០២៣។ នេះជាការប្រកួតមិត្តភាពកម្តៅសាច់ដុំជាមួយហុងកុង និងម៉ាកាវ ដើម្បីត្រៀមប្រកួតជម្រុះនៃបាល់ទាត់ពិភពលោក FIFA WORLD CUP 2026 ជុំទី១ គឺក្រុមជម្រើសជាតិកម្ពុជាត្រូវជួបក្រុមជម្រើសជាតិប៉ាគីស្ថាន ចំនួន២ជើង ដែលជើងទី១ នាថ្ងៃទី១២ ខែតុលា ឆ្នាំ២០២៣ នៅពហុកីឡដា្ឋនជាតិអូឡាំពិក ខណៈជើងទី២នឹងប្រកួតនៅថ្ងៃទី១៧ ខែតុលា ឆ្នាំ២០២៣ នៅប្រទេសប៉ាគីស្ថាន។
ក្រុមឈ្នះ១ក្រុម រវាងកម្ពុជា ឬ ប៉ាគីស្ថាន នឹងត្រូវបន្តឡើងទៅប្រកួតនៅជុំទី២ ក្នុងពូល G ជាមួយ៣ប្រទេសផ្សេងទៀត គឺក្រុម Saudi Arabia, Jordan និង Tajikistan។ គួររម្លឹកថា នេះជាការចាប់ឆ្នោតជ្រើសរើស ក្នុងតារាងចំណាត់ថ្នាក់ FIFA ទាបជាងគេចំនួន២០ប្រទេស ត្រូវចាប់គូគ្នាប្រកួតនៅជុំទី១ មុនគេដែលធ្វើឡើង២ជើងមានលក្ខណៈប្តូរទឹកដីទៅវិញទៅមកក្នុងដី និងក្រៅដី ដើម្បីស្វែងរកអ្នកឈ្នះទៅចូលរួមតាមពូល ក្នុងជុំទី២ ដែលចាប់ឆ្នោតរួចរាល់ កាលពីចុងខែកក្កដា ឆ្នាំ២០២៣កន្លងទៅ។
ពានរង្វាន់បាល់ទាត់ពិភពលោកបានផ្លាស់ប្ដូរពី៣២ក្រុម បង្កើនដល់៤៨ក្រុម សម្រាប់ ឆ្នាំ២០២៦ ដោយជុំទី៥ ឬជុំផ្តាច់ព្រ័ត្រ វគ្គ៤៨ក្រុមចុងក្រោយនឹងធ្វើឡើងដោយសហម្ចាស់ផ្ទះ សហរដ្ឋអាមេរិក កាណាដា និងម៉ិកស៊ិក ពីខែមិថុនា ដល់ខែកក្កដា ឆ្នាំ២០២៦៕
ប្រភព៖ ក្រសួងព័ត៌មាន
