សៀមរាប៖ ឯកឧត្តមបណ្ឌិតទេសរដ្ឋមន្ដ្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា ទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ លើកទី៩ ឆ្នាំ២០២៤ នៅមុខ ប្រាសាទអង្គរវត្ត ខេត្តសៀមរាប នាព្រឹកថ្ងៃទី០៤ ខែសីហា ឆ្នាំ២០២៤នេះ បានស្រូប ទាញអ្នកចូលរួមសរុបចំនួន ៣ ០២១នាក់ ក្នុងនោះមានអត្តពលិកខ្មែរចំនួនជាង ២ ០០០ នាក់ និងអត្តពលិកអន្ដរជាតិចំនួន ៨១៥នាក់ មកពី ៥១ប្រទេស។ ប្រទេសដែលមានអ្នកចូល រួមច្រើន ជាងគេគឺ ជប៉ុន ចិន វៀតណាម ចក្រភពអង់គ្លេស និងថៃ។
លើសពីនេះ ឯកឧត្តមក៏សង្ឃឹមថា អត្តពលិកទាំងអស់ នឹងបន្ដចូលរួមទិវារត់ប្រណាំង អន្ដរជាតិពាក់កណ្ដាលម៉ារ៉ាតុងអង្គរវត្ត លើកទី២០ នាថ្ងៃទី០១ ខែធ្នូ ឆ្នាំ២០២៤ ខាងមុខឱ្យ បានកាន់តែច្រើនផងដែរ។
ឯកឧត្តមទេសរដ្ឋមន្ដ្រី បានសម្ដែងនូវសេចក្ដីសោមនស្សយ៉ាងក្រៃលែង ដោយបាន ទទួលការចាត់តាំងដ៏ខ្ពង់ខ្ពស់ ចូលរួមព្រឹត្តិការណ៍កីឡាទេសចរណ៍ប្រចាំឆ្នាំនេះ។ ក្នុង នាមសម្ដេចធិបតីនាយករដ្ឋមន្ដ្រី ឯកឧត្តមបានសម្ដែងនូវការស្វាគមន៍យ៉ាងកក់ក្ដៅ ចំពោះវត្តមានអត្តពលិកជាតិ និងអន្ដរជាតិ ដែលបានចូលរួមទិវារត់ប្រណាំងម៉ារ៉ាតុង អន្ដរជាតិ ចក្រភពអង្គរលើកទី៩ ដែលជាចលករដ៏សំខាន់ក្នុងការរួម ចំណែកលើកកម្ពស់វិស័យ ទេសចរណ៍ ពិសេសនៅគោលដៅខេត្តសៀមរាប។
ឯកឧត្តមបណ្ឌិត ថោង ខុន មានប្រសាសន៍ថា «ឆ្លៀតក្នុងឱកាសដ៏មហោឡារិកនេះ ខ្ញុំសូមអំពាវនាវដល់ប្រិយមិត្តជាតិ-អន្ដរជាតិទាំងអស់ ចូលរួមអបអរសាទរពិធីបើក ការដ្ឋានសាងសង់ផ្លូវការ “ព្រែកជីកហ្វូណនតេជោ” នាថ្ងៃស្អែកនេះ ដែលជាព្រែកជីក ប្រវត្តិសាស្ដ្រ ក្រោមគំនិតផ្ដួចផ្ដើមរបស់សម្ដេចតេជោ ហ៊ុន សែន ហើយបន្ដស្នាដៃ និងជំរុញបន្ថែមក្នុងការអភិវឌ្ឍគម្រោងដោយសម្ដេចធិបតី ហ៊ុន ម៉ាណែត ក្រោមស្មារតី “គម្រោងរបស់ខ្មែរទាំងអស់ ដោយខ្មែរ និងដើម្បីខ្មែរគ្រប់រូប”» ។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គ លេខាធិការ NOCC បានឱ្យ ដឹងថា ទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ ឆ្នាំនេះ រៀបចំឡើងក្នុងគោលបំណងសំខាន់ៗ ៣ រួមមាន៖ ១-ផ្ដោតការយកចិត្តទុកដាក់ទៅ លើភាពសប្បាយរីករាយរបស់ប្រជាពលរដ្ឋ ក៏ដូចជារាជរដ្ឋាភិបាល ចំពោះព្រឹត្តិការណ៍ ប្រវត្តិសាស្ដ្រ នៃពិធីសម្ពោធបើកការដ្ឋានសាងសង់គម្រោងព្រែកជីកហ្វូណនតេជោ នាថ្ងៃទី០៥ ខែសីហា ឆ្នាំ២០២៤, ២-រត់ដើម្បីជួយដល់មន្ទីរពេទ្យគន្ធបុប្ផា និង ៣-រត់ដើម្បីថែ រក្សាសោភណភាព អនាម័យ បរិស្ថាន នៅតំបន់បេតិកភណ្ឌអង្គ និងចូលរួមលើក កម្ពស់ប្រតិបត្តិការទេសចរណ៍ នៅខេត្តសៀមរាប។
សម្រាប់លទ្ធផល វិញ្ញាសារត់ម៉ារ៉ាតុង (៤២គីឡូម៉ែត្រ) ផ្នែកបុរសលេខ១ កីឡាករកម្ពុជា វ៉ាន់ ភារ៉ា ប្រើថិរវេលា ២ម៉ោង ៤០នាទី និង ៥១វិនាទី/ លេខ២ កីឡាករជប៉ុន Yuki Kaneyama ប្រើថិរវេលា ២ម៉ោង ៤៧វិនាទី និង ២៩វិនាទី/ លេខ៣ កីឡាករវៀតណាម Dai Be Thanh ប្រើថិរវេលា ២ម៉ោង ៥៤នាទី និង ០៥វិនាទី។ វិញ្ញាសាម៉ារ៉ាតុង (រត់ចម្ងាយ ៤២គីឡូម៉ែត្រ) ផ្នែកនារីលេខ១ កីឡាការិនីអៀកឡង់ Caitriona Jennings ប្រើថិរវេលា ៣ម៉ោង ០៥នាទី និង ៤៣.១៩វិនាទី/ លេខ២ កីឡាការិនីវៀតណាម Nguyen Thi Linh ប្រើថិរវេលា ៣ម៉ោង ១៣នាទី និង ៣៥.៥៤វិនាទី លេខ៣ កីឡាការិនីចិន Qi Wang ប្រើថិរវេលា ៣ម៉ោង ៤១នាទី និង ០៧.៨០វិនាទី៕
