ភ្នំពេញ៖ ក្នុងការប្រមូលផ្តុំហ្វឹកហាត់ក្រុមបាល់ទាត់ជម្រើសជាតិកម្ពុជា ល្ងាចថ្ងៃទី០២ ខែធ្នូ ឆ្នាំ២០២៤ នៅពហុកីឡដ្ឋានជាតិអូឡាំពិក គ្រូបង្គោលកម្ពុជា លោក Gyotoku Koji បានលើកឡើងថា ៖«ការត្រៀមខ្លួននេះយើងមានពេលវេលាប្រហែល១សប្តាហ៍ទៀត ហើយយើងនឹងព្យាយាមធ្វើឱ្យបានល្អបំផុត តាមដែលអាចធ្វើទៅបាន ដោយយើងមិនទាន់ដឹងថា យើងនឹងអាចធ្វើបានតាមអ្វីដែលអ្នកគាំទ្រកម្ពុជាចង់បានឬក៏អត់ទេ ប៉ុន្តែក្រុមកម្ពុជានឹងប្រឹងប្រែងធ្វើឱ្យអស់ពីសមត្ថភាព»។
នេះជាការប្រមូលផ្តុំហ្វឹកហាត់ សម្រាប់ការប្រកួតពានរង្វាន់ ASEAN Mitsubishi Electric Cup 2024 ដែលគ្រោងនឹងចាប់ផ្តើមពីថ្ងៃទី០៨ ខែធ្នូ ឆ្នាំ២០២៤តទៅ។ លោក Gyotoku Koji គូសបញ្ជាក់ថា អ្វីដែលសំខាន់ ក្នុងការប្រមូលផ្តុំលើកនេះ មានកីឡាករបរទេសចូលសញ្ជាតិខ្មែរ៣នាក់បន្ថែម ដូចជាខ្សែការពារ Ose Takaki (ជប៉ុន) និងខ្សែប្រយុទ្ធ Andres Neito (កូឡុំប៊ី) របស់ក្លឹបភ្នំពេញក្រោន និងខ្សែប្រយុទ្ធ Abdel Kader Coulibaly (កូឌឺវ័រ) ប្រធានក្រុម ISI ដង្កោសែនជ័យ។ ដូច្នេះសរុបកីឡាករចូលសញ្ជាតិ ក្នុងក្រុមជម្រើសជាតិកម្ពុជា លើកនេះមានចំនួន ៦នាក់ គឺមានខ្សែការពារជាតិ កាន់ ម៉ូ សញ្ជាតិដើមអាហ្វ្រិកខាងត្បូង មកពីវិសាខា, យូឌៃ អូកាវ៉ា សញ្ជាតិដើមជប៉ុន ក្លឹបភ្នំពេញក្រោន និង មីហ្ស៊ូណូ ហ៊ីការ៉ុ សញ្ជាតិដើមជប៉ុន មកពីក្លឹបព្រះខ័នរាជស្វាយរៀង។
គ្រូបង្គោលកម្ពុជាជនជាតិជប៉ុនរូបនេះគូសបញ្ជាក់ទៀតថា ចំពោះកីឡាករមួយចំនួន ដែលបានទៅបោះជំរំហ្វឹកហាត់នៅប្រទេសកាតាកន្លងទៅថ្មីៗនេះ ហើយមិនបានជាប់ក្នុងក្រុមជម្រើសជាតិកម្ពុជា សម្រាប់ការប្រកួត ពានរង្វាន់ ASEAN Mitsubishi Electric Cup 2024 នេះ គឺជារឿងធម្មតា ហើយសមាជិកក្រុមជម្រើសជាតិតែងតែមានការផ្លាស់ប្តូរ ដោយកីឡាករមានគុណភាពល្អបានបន្តជាប់ឈ្មោះ ហើយកីឡាករមួយចំនួនមិនមានគុណភាពល្អបានធ្លាក់ចេញពីការជម្រុះ ជាពិសេសគឺការតាមដានរបស់លោក ក្នុងការប្រកួតក្នុងក្របខណ្ឌជម្រើសជើងឯកខេមបូឌានព្រីមៀរលីគ តែម្តង។ នេះជាការជ្រើសរើសដោយផ្ទាល់របស់លោក តាមរយៈការពិនិត្យតាមដានការប្រកួតលីគកំពូលដោយផ្ទាល់។
ជុំវិញកីឡាករបរទេសចូលសញ្ជាតិខ្មែរ៣នាក់បន្ថែមនេះ គឺដោយសារតែកីឡាករទាំង៣រូបនេះលេងនៅលីគកំពូលកម្ពុជាយូរឆ្នាំមកហើយៗសហព័ន្ធកីឡាបាល់ទាត់កម្ពុជាបានរៀបចំលើបញ្ហានេះយូរមកហើយដែរ។ ពេលទទួលបានដំណឹងនេះ លោកក៏បានតាមដានចំពោះកីឡាករចូលបញ្ជាតិខ្មែររហូតមកៗពួកគាត់ទាំង៣នាក់នេះក៏បង្ហាញពីភាពលេចធ្លោខ្លាំងផងដែរ ក្នុងការប្រកួតលីគកន្លងមក។ លោកសង្ឃឹមថា កីឡាករចូលសញ្ជាតិខ្មែរបន្ថែមចំនួន៣នាក់នេះនឹងក្លាយជាកម្លាំងដ៏រឹងមាំបន្ថែម សម្រាប់ក្រុមជម្រើសជាតិកម្ពុជាទាំងមូល ក្នុងការប្រកួតនាពេលខាងមុខឆាប់ៗនេះ។
សហព័ន្ធកីឡាបាល់ទាត់កម្ពុជា-FFCបានចេញបញ្ជីឈ្មោះកីឡាករ ២៦នាក់ ដើម្បីប្រមូលផ្តុំហ្វឹកហាត់ត្រៀមការប្រកួតបាល់ទាត់ជើងឯកអាស៊ាន AFF Mitsubishi Electric Cup ឆ្នាំ២០២៤ គ្រោងពីថ្ងៃទី០៨ ខែធ្នូ ឆ្នាំ២០២៤ ដល់ថ្ងៃទី០៥ ខែមករា ឆ្នាំ២០២៥ ដោយត្រូវប្រកួតក្នុងទឹកដី និងក្រៅទឹកដី។ ក្រុមកម្ពុជាត្រូវប្រកួតបើកឆាកពូលA នឹងត្រូវជួបម៉ាឡេស៊ី នាថ្ងៃទី០៨ ខែធ្នូ ឆ្នាំ២០២៤ នៅពហុកីឡដ្ឋានជាតិអូឡាំពិក បន្ទាប់មកក្រុមកម្ពុជា ប៉ះសិង្ហបុរី, ប៉ះ ទីម័រខាងកើត និងចុងក្រោយបញ្ចប់ពូល ប៉ះម្ចាស់ផ្ទះថៃ នាថ្ងៃទី២០ ខែធ្នូ ឆ្នាំ២០២៤។ ចំពោះពូល B ក៏មាន៥ក្រុមដូចគ្នា ដូចជា វៀតណាម ឥណ្ឌូណេស៊ី ហ្វីលីពីន មីយ៉ាន់ម៉ា និងក្រុមឡាវ៕
