វៀតណាម៖ ក្រុមព្រះខ័នរាជស្វាយរៀងរបស់កម្ពុជា និងក្រុមម្ចាស់ផ្ទះ Dong A Thanh Hoa របស់វៀតណាមបានចែកគ្នាម្នាក់១ពិន្ទុ បន្ទាប់ពីរក្សាលទ្ធផលស្មើគ្នា ០-០ នៅក្នុងការប្រកួតទី៤ ក្នុងវគ្គសន្សំពិន្ទុពូលA នៃការប្រកួតកីឡាបាល់ទាត់ ពានរង្វាន់ក្លឹបជើងឯកអាស៊ាន រដូវកាល ២០២៤-២០២៥ (2024–25 ASEAN Club Championship Shopee Cup) កាលពីយប់ថ្ងៃទី២២ ខែមករា ឆ្នាំ២០២៥។
ឆ្លងកាត់៤ប្រកួតកន្លងមក ព្រះខ័នរាជស្វាយរៀង ដែលជាក្រុមជើងឯកលីគកំពូលកម្ពុជា រដូវកាល ២០២៣-២០២៤ បានឈ្នះ១ ស្មើ១ និងចាញ់៣ប្រកួត មាន៤ពិន្ទុ ឈរនៅចំណាត់ថ្នាក់លេខ៥ ក្នុងចំណោម៦ក្រុមក្នុងពូល A ខណៈ៤ប្រកួតរបស់ Dong A Thanh Hoa របស់វៀតណាមឈ្នះ១ និងស្មើ៣មាន៦ពិន្ទុ ធ្លាក់ពីដំណេងលេខ២បណ្តោះអាសន្នមកឈរនៅចំណាត់ថ្នាក់លេខ៤វិញ។ ចំពោះ២ក្រុមឈរនៅលេខ១ និងលេខ២ បណ្តោះអាសន្ន និងកំពុងក្តោបក្តាប់ក្នុងកៅអីឡើងទៅវគ្គពាក់កណ្តាលផ្តាច់ព្រ័ត្រ គឺក្រុម BG Pathum United ឈរលេខ១ ឈ្នះ២ និងស្មើ២ មាន៨ពិន្ទុ និងលេខ២ ក្រុម Terengganu ក្រោយឈ្នះ២ ស្មើ១ និងចាញ់១ មាន៧ពិន្ទុ។
១ប្រកួតចុងក្រោយនៃវគ្គសន្សំពិន្ទុក្នុងពូល A គឺក្រុមព្រះខ័នរាជស្វាយរៀង នឹងត្រូវជួបក្រុម Shan United របស់ប្រទេសមីយ៉ាន់ម៉ា នាវេលាម៉ោង ១៩:០០ ថ្ងៃ០៥ ខែកុម្ភៈ ឆ្នាំ២០២៥ នៅពហុកីឡដ្ឋានជាតិអូឡាំពិក រាជធានីភ្នំពេញ៕
