ភ្នំពេញ៖ ការប្រកួតកីឡាបញ្ចស៊ីឡាត់ ជ្រើសរើសជើងឯកថ្នាក់ជាតិ លើកទី១ ប្រចាំឆ្នាំ២០២៥បានបញ្ចប់ដោយជោគជ័យ កាលពីយប់ថ្ងៃទី០៨ ខែមីនា ឆ្នាំ២០២៥ នៅមជ្ឈមណ្ឌលហ្វឹកហាត់ការ៉ាតេសាកលវិទ្យាល័យភូមិន្ទភ្នំពេញ ដោយសាលាគុនកងពលតូចថ្មើរជើងលេខ៥១ ដណ្តើមបានចំណាត់ថ្នាក់លេខ១ ក្នុងចំណោម២២សាលាគុន ជាមួយនឹងការដណ្តើមបានមេដាយមាស១០វិញ្ញាសា ក្នុងចំណោម១៥វិញ្ញាសា។
ពិធីបិទការប្រកួតជាផ្លូវការនេះត្រូវបានប្រារព្ធធ្វើឡើងក្រោមវត្តមាន ឯកឧត្តម ព្រំ ប៊ុណ្ណយី ទីប្រឹក្សាក្រសួងអប់រំ យុវជន និងកីឡា និងតំណាងឯកឧត្តម សេង ធារិន ប្រធានសហព័ន្ធកីឡាបញ្ចស៊ីឡាត់កម្ពុជា។
លោក ឈាង សុវណ្ណរតនា អនុប្រធាន សហព័ន្ធកីឡាបញ្ចស៊ីឡាត់កម្ពុជាបានលើកឡើងថា លោកបានសង្កេតឃើញថា ព្រឹត្តិការណ៍ជើងឯកថ្នាក់ជាតិ លើកទី១ ឆ្នាំ២០២៥នេះទទួលបានការចូលរួមពីសាលាគុន ប្រតិភូ គ្រូបង្វឹក កីឡាករ កីឡាការិនីបានយ៉ាងច្រើនកុះករ ជាពិសេសក្នុងចំណោម១៥វិញ្ញាសា ដែលសហព័ន្ធបានរៀបចំដាក់ឱ្យប្រកួតប្រជែងមេដាយ គឺមានកីឡាករ កីឡាការិនីចូលរួមប្រកួតគ្រប់ប្រភេទទម្ងន់ទាំងអស់។ ជាមួយគ្នានេះ លោកក៏បានកោតសរសើរ និងវាយតម្លៃខ្ពស់ចំពោះឆន្ទៈប្រកួតរបស់កីឡាករ កីឡាការិនីមានភាពមោះមុតខ្លាំង ហើយលោកជឿជាក់យ៉ាងមុតមាំថា ការប្រកួតនៅលើកក្រោយៗទៀត កីឡាករ កីឡាការិនីនឹងបន្តចូលរួមប្រកួតប្រជែងបន្តបន្ទាប់ទៀត។ លោកអនុប្រធានចាត់ទុកថា កីឡាករ កីឡាការិនី ដែលចូលរួមប្រកួតនេះ គឺជាអ្នកប្រយុទ្ធអង់អាចក្លាហានលើសង្វៀនប្រកួត ហើយត្រូវធ្វើជាយុវជនគំរូ នៅក្រៅសង្វៀនប្រកួត ដើម្បីឱ្យទទួលបានកិត្តិយសសម្រាប់ខ្លួនឯង ក្រុម ក្លឹប ក៏ដូចជាប្រទេសជាតិផងដែរ។
ជាមួយគ្នានេះ លោក អ៊ួ តារា អគ្គលេខាធិការ សហព័ន្ធកីឡាបញ្ចស៊ីឡាត់កម្ពុជាបានឱ្យដឹងថា ការប្រកួតកីឡាបញ្ចស៊ីឡាត់ ជ្រើសរើសជើងឯកថ្នាក់ជាតិ លើកទី១ ឆ្នាំ២០២៥ទទួលបានការចុះឈ្មោះចូលរួមពី២២សាលាគុនមកពី៩រាជធានី-ខេត្ត និងមានអត្តពលិកសរុប ១២៧នាក់ (កីឡាករ ៨៦នាក់ និងកីឡាការិនី៤១នាក់) និងបូកសរុបរួមទាំងប្រតិភូគ្រូបង្វឹក មន្ត្រីគណៈកម្មការ ក្រុមការងារទទួលបន្ទុកអនុគណៈកម្មការនីមួយ មានចំនួនសរុប ២១២នាក់។ ចំពោះវិញ្ញាសាមានចំនួន ១៥ ក្នុងនោះមានប្រយុទ្ធផ្នែកបុរស ៩វិញ្ញាសា និងប្រយុទ្ធនារី ៦វិញ្ញាសា។
លោក អ៊ួ តារា បានលើកឡើងថា ក្រោមការចង្អុលបង្ហាញរបស់ឯកឧត្តម សេង ធារិន ប្រធានសហព័ន្ធកីឡាបញ្ចស៊ីឡាត់កម្ពុជានិងអនុប្រធាន ព្រមទាំងសមាជិកប្រតិបត្តិសហព័ន្ធបានជំរុញឱ្យរៀបចំការប្រកួតជើងឯកថ្នាក់ជាតិនេះឱ្យចេញជារូបរាងឡើងជាលើកដំបូង ដើម្បីបោះជំហានមួយទៀត ក្នុងការប្រមូលផ្តុំអត្តពលិកប្រកបដោយទេពកោសល្យ និងផ្សព្វផ្សាយប្រភេទកីឡាបញ្ចស៊ីឡាត់ឱ្យបានសុះសាយនៅប្រទេសកម្ពុជា។
ជាលទ្ធផលបច្ចេកទេស ក្នុងចំណោម ១៥វិញ្ញាសា រួមមាន៖ ចំណាត់ថ្នាក់លេខ១ សាលាគុនកងពលតូចថ្មើរជើងលេខ៥១ ទទួលបាន មេដាយមាស ១០គ្រឿង, លេខ២ សាលាគុនតារាជ មេដាយសរុប ៥គ្រឿង (មាស ២ សំរឹទ្ធ៣), លេខ៣ សាលាគុន ឫទ្ធាឥសាន មេដាយសរុប ៤ (មាស១ ប្រាក់២ សំរឹទ្ធ១) លេខ ៤ សាលាគុន ហនុមានមានជ័យ មេដាយសរុប៤គ្រឿង (មាស១ សំរឹទ្ធ២) លេខ៥ សាលាគុន ស៊ីឡាត់ភ្នំពេញ មេដាយមាស១ និងសំរឹទ្ធ១៕
