ភ្នំពេញ៖ ឯកឧត្តម ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍ អនុគណៈកម្មការបច្ចេកទេសនៃគណៈកម្មាធិការជាតិរៀបចំបុណ្យជាតិ-អន្តរជាតិបញ្ជាក់ថា នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ មានទូកអុំ និងទូកចែវ សរុប ៣៤៨ទូក និងមានចំណុះទូកជាកីឡាករ កីឡាការិនី ២២០៤២នាក់ ដោយចំនួននេះបានកើនឡើងច្រើនជាងព្រឹត្តិការណ៍ដូចគ្នា កាលពីឆ្នាំ២០២៣កន្លងទៅ។
ថ្លែងប្រាប់ទីភ្នាក់ងារសារព័ត៌មានកម្ពុជា AKP នៅទីធ្លាសួនច្បារមុខព្រះបរមរាជវាំង នៅថ្ងៃទី១២ ខែវិច្ឆិកា ឆ្នាំ២០២៤នេះ ឯកឧត្តម ប៊ូ ជុំសេរី បានសង្កត់ធ្ងន់ថា ក្នុងចំណោមទូកសរុប ចំនួន ៣៤៨ទុក ក្នុងនោះមានចំនួនទូកអុំបុរសចំនួន ១៧១ទូក ចែវបុរសចំនួន ៤៤ទូក ទូកខ្នាតអន្តរជាតិបុរស ១៣០ទូក ខ្នាតអន្តរជាតិនារី ៣ទូក។ កម្លាំងចំណុះទូកជាកីឡាករ កីឡាការិនីសរុប ២២០៤២នាក់ ក្នុងនោះចំនួនចំណុះទូកពេញសិទ្ធិបុរស ១៧៥៤នាក់ និងនារី១០៦នាក់ ខណៈចំណុះទូកបម្រុងបុរស ៤២៩៤នាក់ និងនារី ១០២នាក់។
ចំនួនទូក និងចំណុះទូកនេះមកពីក្រសួង រាជធានី-ខេត្ត អង្គភាពស្ថាប័ន សមាគមសរុបចំនួន ២៧ ក្នុងនោះខេត្តដែលបានបញ្ជូនទូកមកចូលរួមប្រណាំងទូកច្រើនជាងគេឈរនៅលំដាប់ថ្នាក់ពីលេខ១ដល់លេខ៤ រួមមានខេត្តព្រៃវែង ខេត្តកណ្តាល រាជធានីភ្នំពេញ និងខេត្តកំពង់ចាម។
កត្តាសំខាន់ៗ ដែលធ្វើឱ្យចំនួនទូក និងចំណុះទូកកើនឡើងច្រើនជាង ឆ្នាំ២០២៣កន្លងទៅ ត្រូវបានឯកឧត្តមប្រធានគណៈមេប្រយោគរូបនេះកត់សម្គាល់លើមូលហេតុចម្បងមួយចំនួន ដូចជាកត្តាសុខសន្តិភាពពេញលេញទូទាំងប្រទេស និងការរីកចម្រើន ដែលជាឱកាសកាន់តែល្អប្រសើរសម្រាប់ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ដោយមានលក្ខណៈកាន់តែល្អប្រសើរជាងឆ្នាំមុន។ យើងអាចវាយតម្លៃបានថា ប្រជាពលរដ្ឋកាន់តែមានជំនឿទុកចិត្តកាន់តែខ្លាំង ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបន្តគោលនយោបាយពីសម្តេចតេជោ ហ៊ុន សែន អតីតនាយករដ្ឋមន្ត្រី។ ម្យ៉ាងទៀត គឺប្រជាពលរដ្ឋមានឆន្ទៈខ្ពស់ ក្នុងការចូលរួមលើកស្ទួយវប្បធម៌ ប្រពៃណី ទំនៀមទម្លាប់ខ្មែរយើងកាន់តែខ្លាំងឡើងៗ ដែលជាការគាំទ្រដល់ការអភិរក្សនៃពិធីបុណ្យជាតិដ៏ធំនេះផងដែរ៕
