ព្រះសីហនុ៖ មន្ទីរអប់រំយុវជន និងកីឡាខេត្តព្រះសីហនុបានរៀបចំពីធីបិទការប្រកួតកីឡាសិស្សបឋមសិក្សា និងសិស្សមធ្យមសិក្សាជ្រើសរើសជើងឯកថ្នាក់ខេត្តប្រចាំឆ្នាំ២០២៤-២០២៥ នៅទីលានបាល់ទាត់សាលាអនុវិទ្យាល័យសម្តេចឪ ស្ថិតក្នុងសង្កាត់លេខ៣ ក្រុងព្រះ សីហនុ នារសៀលថ្ងៃសុក្រទី២៨ ខែមីនា ឆ្នាំ២០២៥ ដោយមានការចូលរួមពីលោក លោកស្រីប្រធានមន្ទីរ អង្គភាពក្នុងខេត្តព្រះសីហនុ។
លោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុ បានធ្វើរបាយការណ៍សង្ខេប ស្តីពីការប្រកួតកីឡាសិស្សបឋមសិក្សា និងមធ្យមសិក្សាជ្រើសរើសជើង ឯកថ្នាក់ខេត្តប្រចាំឆ្នាំ២០២៤-២០២៥ ដែលមាន៦ វិញ្ញាសារ ក្នុងនោះ វិញ្ញាសាបាល់ទាត់ វិញ្ញាសាបាល់ទះ វិញ្ញាសាអត្តពលកម្ម វិញ្ញាសាចោលដុំដែក វិញ្ញាសាលោតចម្ងាយ វិញ្ញាសាលោកកម្ពស់ ដែលមានកីឡាករ កីឡាការិនីចូលរួមចំនួន ២៥ក្រុម សរុបចំនួន ៣០៧នាក់ ស្រី ២៤នាក់ និងមានគ្រូបង្វឹក គ្រូជំនួយចំនួន៩៦នាក់ ស្រី ៨នាក់។
លោក សាមុត សុធារិទ្ធ អភិបាលរងខេត្តព្រះសីហនុ បានមានប្រសាសន៍អបអរសាទរសម្រាប់ជ័យលាភី នៃការប្រកួតកីឡាសិស្សបឋមសិក្សា និងសិស្សមធ្យមសិក្សាជ្រើសរើសជើងឯកថ្នាក់ខេត្តប្រចាំឆ្នាំ២០២៤-២០២៥នាពេលនេះ ព្រោះការប្រកួតកីឡាជ្រើស រើសជើងឯកនាពេលនេះ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ២០២៥នាពេលនេះ ការឡេងកីឡាតែងតែមានចាញ់ និងឈ្នះ ដូច្នេះកីឡាក្រុមនិមួយបានបញ្ចេញនូវកម្លាំង និងបច្ចេកទេសដើម្បីជួនក្រុមរៀងៗខ្លួន និងឈានដល់ការទទួលបាន នូវជ័យលាភីនាពេលនេះ។ ការប្រកួតកីឡាជ្រើសរើសជើងឯកថ្នាក់ខេត្តប្រចាំឆ្នាំ២០២៤-២០២៥ ក្នុងគោលបំណងបំផុសស្មារតីដល់យុវជន យុវនារីរបស់យើង ឪ្យជ្រើសរើសឡេងកីឡាមួយប្រភេទ ក្នុងចំណោមយុវជនយើងម្នាក់ ព្រោះការលេងកីឡានាំមកនូវមិត្តភាព សាមគ្គីភាពរួមចំណែកយ៉ាងសំខាន់ដល់ការពង្រឹងឯកភាពជាតិ និងសុខសន្តិភាពនៅកម្ពុជា។ វិស័យអប់រំកាយ និងកីឡាមិនគ្រាន់តែបានផ្តល់នូវកាយសម្ប ទារឹងមាំដល់យុវជន យុវនារីរបស់យើងតែប៉ុណ្ណោះទេ ប៉ុន្តែថែមទាំងបានធ្វើការអប់រំទៅ លើផ្លូវចិត្ត ផ្លូវកាយ និងសីលធម៌ ដោយធ្វើយ៉ាងណាឱ្យពួកគេមានការតស៊ូប្រកបដោយភាពអង់អាចក្លាហាន អំណត់ព្យាយាម និងចេះយោគយល់ អធ្យាស្រ័យគ្នាទៅវិញទៅមក ព្រមទាំងប្រកាន់ខ្ជាប់នូវការយោគយល់អត់អោនគ្នាថែមទៀងផង។
ទន្ទឹមនឹងនេះ លោកអភិបាលរងខេត្តបានបញ្ជាក់ថា ដើម្បីអភិវឌ្ឍវិស័យអប់រំកាយ និងកីឡាទាំងក្នុងក្របខ័ណ្ឌបច្ចេកទេស និងការអនុវត្តជាក់ស្តែង ដើម្បីពង្រឹងសមត្ថភាពដល់ក្រុមកីឡាករ និងកីឡាការិនីនៅក្នុងខេត្តព្រះសីហនុឱ្យកាន់តែមានបច្ចេកទេស មានថាមពលសម្រាប់ចូលរួមប្រកួតដណ្តើមយកជ័យជម្នះលើការប្រកួតនានា។ រដ្ឋបាលខេត្តក៏បានលើកទឹកចិត្ត និងផ្តល់ការឧបត្ថម្ភគាំទ្រដល់គ្រប់រូបភាពលើសកម្មភាពកីឡានៅក្នុងខេត្តព្រះសីហនុ ការសាងសង់ហេដ្ឋារចនាសម្ព័ន្ធរូបវន្តគាំទ្រការលេងកីឡា និងការបំពាក់ឧបករណ៍កីឡានៅតាមទីសាធារណៈ ក្នុងគោលបំណងបំផុសលើកទឹកចិត្តប្រជាជន ពិសេសយុវជនរបស់យើងឱ្យស្រឡាញ់កីឡា ចូលចិត្តកីឡា លេងកីឡា និងការហាត់ប្រាណ ដើម្បីពង្រឹងកាយសម្បទា និងទប់ស្កាត់ការសេពគ្រឿងញៀន ទប់ស្កាត់ការឈឺថ្កាត់ ជាពិសេសជំងឺទាក់ទងទៅនឹងបេះដូង និងការដាច់សរសៃខួរក្បាល ឬក៏ប្រភេទជំងឺផ្សេងៗទៀតផងដែរ។ សូមបង្កើនការយកចិត្តទុកដាក់លើកកម្ពស់ និងបំផុសចលនាអប់រំកាយ និងកីឡាក្នុងស្រទាប់ប្រជាជន ជាពិសេសយុវជនរបស់យើងឱ្យមានសក្តានុពលគ្របដណ្តប់ទាំងផ្នែកបរិមាណ និងគុណភាពលើវិស័យកីឡាឱ្យបានគ្រប់គ្នា៕
