ភ្នំពេញ៖ ការប្រឡងតំឡើងខ្សែក្រវាត់ និងការប្រកួតជ្រើសរើសសិស្សឆ្នើមប្រចាំសាលាគុន សុរិយាការ៉ាតេ-ដូ សូតូកង់ ឆ្នាំ២០២៤ កាលពីថ្ងៃទី១៥ ខែមិថុនា ឆ្នាំ២០២៥ ក្រោមការសហការរវាងសាលាគុនសុរិយា ការ៉ាតេ-ដូ សូតូកង់ និងហាងលក់សម្ភារកីឡា Decathlon ក្នុងគោលបំណងដើម្បីអបអរសាទរគម្រប់ខួបនៃការបង្កើតសាលាគុនជារៀងរាល់ឆ្នាំ ដើម្បីស្វែងរកសិស្សឆ្នើមៗប្រចាំសាលាគុននៅផ្សារទំនើបអ៊ីអនម៉លមានជ័យ។
លោកគ្រូ ឡាច ច័ន្ទដារ៉ា ប្រធានសាលាគុន សុរិយា ការ៉ាតេ-ដូ សូតូកង់ បានមានប្រសាសន៍ថា ការប្រកួតជ្រើសរើសសិស្សឆ្នើមប្រចាំសាលាគុន សុរិយា ការ៉ាតេ-ដូ សូតូកង់ ឆ្នាំ២០២៤នេះត្រូវបានធ្វើឡើងក្នុងគោលបំណងអបអរសាទរគម្រប់ខួបនៃការបង្កើតសាលាគុនជារៀងរាល់ឆ្នាំ ស្វែងរកសិស្សពូកែ និងឆ្នើមប្រចាំសាលាគុន បង្កើតបរិយាសថ្មីសម្រាប់សិស្សានុសិស្ស ក្រៅពីការហ្វឹកហាត់ឲ្យខិតខំដុសខាត់សមត្ថភាព ដើម្បីត្រៀមខ្លួនចូលរួមការប្រកួតនានា ក៏ដូចជាផ្ដល់ឱកាសដល់សិស្សានុសិស្សអាចបង្ហាញសមត្ថភាព តាមរយៈការប្រកួតលើកទឹកចិត្តសិស្សានុសិស្សឱ្យមានភាពក្លាហាន ហ៊ានជម្នះភាពភ័យខ្លាច មានការតស៊ូ និងអត់ធ្មត់ និងឱ្យសិស្សានុសិស្សអាចស្វែងយល់បន្ថែម និងទទួលបានបទពិសោធដោយផ្ទាល់អំពីដំណើរការ និងទិដ្ឋភាពនៃការចូលរួមការប្រកួត។
លោកប្រធានសាលាគុន សុរិយា បានបញ្ជាក់ថា ការប្រកួតនេះ មានសិស្សគុនចូលរួមសរុប ៤៧នាក់ ក្នុងនោះស្រី ១១នាក់មកពីថ្នាក់ហ្វឹកហាត់នៅមជ្ឈមណ្ឌលយុទ្ធសិល្ប៍បុរាណ កម្ពុជា-ជប៉ុន (ក្នុងបរិវេណស្ដាតអូឡាំពិក) សាលាគុនសុរិយា ការ៉ាតេ-ដូ សូតូកង់ និងនៅហាងលក់សម្ភារកីឡា Decathlon នៃផ្សារទំនើបអ៊ីអនម៉លមានជ័យនេះផ្ទាល់។
ជាមួយនឹងការប្រកួតប្រចាំឆ្នាំដ៏មានសារៈសំខាន់ លោកគ្រូប្រធានសាលាគុនក៏បានរម្លឹកប្រវត្តិសង្ខេបរបស់សាលាគុន សុរិយា ការ៉ាតេ-ដូ សូតូកង់ថា ក្លឹបសុរិយាមានន័យថា «ព្រះអាទិត្យ» មានឈ្មោះល្បីល្បាញយូរលង់ណាស់មកហើយ ជាពិសេស គ្រូការ៉ាតេជាច្រើននៅកម្ពុជា ភាគច្រើនគឺជាសិស្សគុននៃក្លឹបសុរិយា។
ក្រោយរបបប្រល័យពូជសាសន៍ ប៉ុល ពត ដ៏ខ្មៅងងឹតរយៈពេទ្យ ៣ឆ្នាំ ៨ខែ ២០ថ្ងៃ បានដួលរលំទៅ ឧត្តមការ៉ាតេចារ្យ ឡាច ច័ន្ទសុវណ្ណ បានលះបង់ និងចំណាយពេញមួយជីវិតដើម្បីចូលរួមអភិវឌ្ឍកីឡាការ៉ាតេ-ដូកម្ពុជា ដោយលោកបានប្រមូលយុវជនក្មេងៗមកហ្វឹកហាត់កីឡាការ៉ាតេ-ដូ «ស្ទីលហ្គិនស៊ីរីយូ» នៅថ្ងៃទី២០ ខែកញ្ញា ឆ្នាំ១៩៨២ នៅក្លឹបក្បាលមាន់ចែ ក្រោយមកដោយមានការរារាំង រករឿងមិនឱ្យមានការប្រមូលផ្តុំហ្វឹកហាត់ពីសំណាក់អាជ្ញាធរមូលដ្ឋាន។ ពេលនោះក្លឹបក៏មានការផ្លាស់ប្តូរជាញឹកញ៉ាប់។ លុះមកដល់ឆ្នាំ១៩៩០ ដោយមានការចុះកិច្ចព្រមព្រៀងនៅទីក្រុងប៉ារីស ដូច្នេះការ៉ាតេក៏ត្រូវបានទទួលស្គាល់ពីគណៈកម្មាធិការជាតិអូឡាំពិកកម្ពុជា ជាថ្មីឡើងវិញ។
ដោយមានការរីកចម្រើនឥតឈប់ឈរ ការ៉ាតេបានធ្វើទំនើបកម្មច្ចេកទេស ដើម្បីឱ្យស្មើមុខស្មើមាត់នឹងប្រទេសក្នុងតំបន់ ដោយលោកគ្រូ ឡាច ច័ន្ទដារ៉ា បានទទួលការណែនាំដ៏ខ្ពង់ខ្ពស់បន្តពីឧត្តមការ៉ាតេចារ្យ ឡាច ច័ន្ទសុវណ្ណ ហើយបានខិតខំហ្វឹកហាត់ប្រឹងប្រែង ជម្នះគ្រប់ឧបសគ្គជាមួយនឹងការចំណាយពេលវេលាអស់ជាងសែសិបឆ្នាំ និងធនធានផ្ទាល់ខ្លួនជាច្រើន ដើម្បីអភិវឌ្ឍក្លឹបសុរិយាឱ្យបានក្លាយខ្លួនជា សាលាគុន សុរិយាការ៉ាតេ-ដូ សូតូកង់ នៅថ្ងៃទី១១ ខែវិច្ឆិកា ឆ្នាំ២០១១ ដែលមានហេដ្ឋារចនាសម្ព័ន្ធហ្វឹកហាត់សមរម្យ និងមានការទទួលស្គាល់ពីសហព័ន្ធកីឡាការ៉ាតេកម្ពុជា មានទីតាំងនៅភូមិសន្សំកុសល៥ សង្កាត់បឹងទំពុន ខណ្ឌមានជ័យ រាជធានីភ្នំពេញ។ មកដល់បច្ចុប្បន្ន មានសិស្សជាច្រើនមានសក្តានុពលរហូតដល់បានសាងស្នាដៃជាប្រវត្តិសាស្ត្រក្នុងព្រឹត្តិការណ៍កីឡាអាស៊ីអាគ្នេយ៍លើកទី៣២ ដែលកម្ពុជាធ្វើជាម្ចាស់ផ្ទះ នៅថ្ងៃទី៥ ខែឧសភា ឆ្នាំ២០២៣ ដែលមានកីឡាករ ជ្រុន វីរៈបុត្រ ចូលរួមប្រកួតវិញ្ញាសាប្រយុទ្ធទម្ងន់ ៦៧គ.ក្រ ដណ្តើមបានមេដាយមាស និងកីឡាករ ឆេង ច័ន្ទដារ៉ារតនៈ ប្រកួតវិញ្ញាសាសម្តែងបុរសជាក្រុម ដណ្តើមបាន មេដាយសំរិទ្ធ ជាប្រវត្តិសាស្ត្រក្នុងរយៈពេល ៦៤ឆ្នាំ ដែលការ៉ាតេកម្ពុជាធ្វើបាន។ រហូតមកដល់ពេលនេះ សាលាគុ នៅតែបន្ដបណ្ដុះបណ្ដាលសិស្សជាបន្ដបន្ទាប់ ដែលយើងអាចមើលឃើញពីការរីកធំធាត់ពីមួយឆ្នាំទៅមួយឆ្នាំ។ ហើយកូនៗទាំងអស់ដែលនៅទីនេះ គឺជាចំណែកនៃការរីកចម្រើនរបស់សាលាគុនផងដែរ។
លោកគ្រូ ឡាច ច័ន្ទដារ៉ា បានបន្ថែមថា តាមរយៈការសង្កេត និងឆ្លងកាត់នូវបទពិសោធផ្ទាល់ ការហ្វឹកហាត់ការ៉ាតេពិតជាមានប្រយោជន៍ជាច្រើន សម្រាប់ខ្លួនឯង និងសង្គមជាតិ។ សម្រាប់លោកគ្រូផ្ទាល់ ការហ្វឹកហាត់ការ៉ាតេជួយពង្រឹងកាយសម្បទា និងផ្លូវចិត្តឱ្យរឹងមាំ មានភាពរហ័សរហួន មានភាពអំណត់ តស៊ូ និងមានការតាំងចិត្តខ្ពស់ក្នុងការបំពេញកិច្ចការ។ ជាមួយគ្នានេះ សិស្សានុសិស្សទាំងអស់ក៏បានឆ្លៀតពេលធ្វើលំហាត់ប្រាណ ដើម្បីសុខភាព។ សម្រាប់សង្គមជាតិ ការហ្វឹកហាត់ការ៉ាតេអាចផ្ដល់ឱកាសដល់អ្នកហ្វឹកហាត់ដែលមានសមត្ថភាពបានតំណាងជាតិចូលរួមការប្រកួតជាមួយបណ្ដាប្រទេសផ្សេងៗផងដែរ៕
